ISA-ISIS-min

ISA 用於好似南洋呢類地方,基本法23條唔啱香港

曾幾何時,我都認為新加坡應該要廢咗 ISA (內部安全法),根據 ISA 發出嘅拘留令,政府可以拘留懷疑干犯危害國家安全人士兩年,唔駛審訊(Detention Order),或者發出限制令(Restrction Order),限制人身自由。只不過,我認為香港係唔駛基本法23條,但新加坡可能仍然需要 ISA 。

ISA 係反恐利器,好難廢除

新加坡依家仍然需要 ISA ,因為ISIS喺南洋嘅滲透去到令人不安嘅地步,ISIS吸納嘅人,去到輔警,幼兒教育工作者呢啲位置,如果唔及時運用拘留令,後果大鑊過當年阿爾蓋達組織爭啲炸咗宏茂橋地鐵站。成個南洋都知,回教黐線佬周圍都係,連天主教為主嘅菲律賓,最近都出現ISIS。如果馬來西亞被納吉玩到馬爆嘅話,我都幾肯定吉打、吉蘭丹、玻璃市、登嘉樓呢啲州份,隨時變成ISIS根據地,曾經馬共打森林戰爭嘅霹靂州,更加可能亂到好似伊拉克同敘利亞咁。當南洋咁多牙煙位果陣,我都唔敢廢 ISA 。

況且依家新加坡運用 ISA 係好克制,一般唔涉及政見問題,十分之八九都係回教恐怖分子有關嘅罪行,至會動用到 ISA ,某程度上, ISA 都係捍衛新加坡民主政體,以及世俗體制必須,所以我對南洋 ISA 嘅立場,係好清晰。

但基本上23條係另一樣嘢,中共唔係民主政體,只不過係一個一黨專政嘅竊國政權,點解要立基本法23條?喺香港,我敢百分百肯定,張曉明呢啲人渣會濫用基本法23條,所以香港人根本無選擇,一定係反對23條。而且香港暫時無武裝港獨組織,當然我唔排除中共越玩越高壓,會激出香港共和軍,但如果唔搞基本法23條,搞出香港共和軍嘅機會少好多,反之,如果立咗基本法23條,中共更明顯走咗英中聯合聲明條數,其實係提供合理性搞武裝港獨,我唔明中國共產黨班蠢才,依家仲記唔記得唯物辯證論,定係喺度自己製造敵人,以為可以呃維穩費兼搏懵,但反而令事態更加惡化,如果我係中共,一定派出中紀委捉張曉明上洗頭艇先講,因為真正嘅港獨源頭,其實正坐喺中聯辦。

發表迴響

你的電子郵件位址並不會被公開。 必要欄位標記為 *