食環署-一般事務隊-min

食環署 一般事務隊應該解散重組

食環署 嘅一般事務隊,由以往市政總署年代到依家,都差唔多係最容易引發公憤嘅政府部門之一。因為 食環署 一般事務隊經常對啲老弱進行選擇性執法,以往搞出雞蛋仔伯伯事件,大坑幾乎騷亂,新年好多次都係 食環署 亂冚檔搞出事,魚蛋革命嘅推手,當推係 食環署 。呢次紙皮婆婆放蛇事件,又係傑作嚟,如果律政司唔去要求 食環署 drop case嘅話,我敢肯定會大事。

食環署 一般事務隊文化有問題

食環署 呢種拉老弱去跑數,果啲寬頻檔口、MK古惑仔,大媽賣唱一律唔捉,一方面香港法律有問題,現金交易就捉,無現金交易就唔捉嘅法律漏洞,一直都無人敢阻塞,呢種唔駛向政府交租就可以做生意嘅做法,其實係十分之荒謬絕倫嘅。另一方面, 食環署 一般事務隊嘅文化懶散,而欺善怕惡,大批退休差人喺果度過日辰嘅心態,你估市民睇唔到,加上呢位執紙皮伯伯,係典型果啲唔攞綜援,寧願自力更生嘅真獅子山精神果啲人,香港人對中國移民濫用香港福利制度嘅作風同心態都忍咗好耐。所以呢次拉咗人後,立即爆發民怨,如果喺英國, 食環署 嘅office一早被憤怒嘅人拆咗,啲示威者同你講打class war,好似啲對付Kensington Town Council啲示威者咁,你估仲好似香港泛民果啲咁溫和。

要 食環署 唔會再做火藥庫嘅方法,其實係將一般事務隊解散重組,一方面堵塞法律漏洞(但唔好矯枉過正,連網上小買賣交收都攞去落鑊,如果咁都落鑊又係會死人冚樓),另一方面,係炒晒啲人後,用新嘅文化去重新運作,一如北愛和平進程,點解要解散RUC,要改為成立NIPS,因為RUC以新教徒為主嘅文化根深蒂固,根本無法改革,亦唔可能取信於天主教徒,所以至要解散成個RUC,砍掉重練。同樣, 一般事務隊 嘅問題講緊由英國管治年代到依家,根本係好難解決得到,唯一可以重建公眾信心方法係將成個部門解散,然後喺聘用條件,組織文化上重新做過,至少唔可以再容忍捉老弱傷殘嚟交數呢啲荒謬狀況。次次有事就出聲,跟住就賊過興兵,根本唔係解決問題之道。

One thought on “食環署 一般事務隊應該解散重組

  1. 其實個重點係,呢D咁民生既野係應該好似當年市政局咁有民選議員睇住。Even負責果個民建聯都好過冇民選議員負責,民選議員做得衰你可以用選票趕走佢,官僚懶理你真係冇佢符。

發表迴響

你的電子郵件位址並不會被公開。 必要欄位標記為 *