李光耀-1-min

李光耀 v 李光耀

李光耀 故居嘅問題,已經演變成一場 李光耀 對 李光耀 嘅較量, 李光耀 自己有份創建嘅政治機器,同 李光耀 生前嘅政治信念嘅一場較量。李顯揚拋出李氏家族退出政壇呢句話,令成件事升級為一場對新加坡前途極具決定性嘅一場爭論。

李光耀 嘅政治信念能否戰勝政權機器?

喺新加坡歷史嚟講,呢次李家內部爭論,唔係一間屋嘅問題,李顯揚同李瑋玲都係不愁衣食,而且年紀都有番咁上下,幾個人年紀加埋成二百歲咁滯,如果純粹喺物質嚟講,爭嚟做乜至得架。但如果係李光耀嘅政治信念如何貫徹執行嘅問題,呢件事就另一個問題。

先講點李顯揚同李瑋玲會懷疑李顯龍會推自己個二仔去從政咁大劑嘅背景先,因為李顯龍嘅二仔李鴻毅,係獲得公共服務獎學金後,依家喺新加坡政府任職,位處副署長,喺新加坡,加入公務員系統或軍隊系統,都係加入當地政壇嘅路(另一個係加入報界系統),而李顯揚嘅三個仔,都係一等叻人,只不過,都唔會加入政府,所以李顯龍出現瓜田李下嘅問題,係成件事嘅觸發點。雖然李鴻毅有可能係,成世人只係想做一個公務員。做公務員,無話一定要從政。

其實成件事一個大問題係,李顯龍甚至本人都未必想自己嘅子女從政,而係人民行動黨成個黨本身,係唔係有一個明確去李光耀化嘅立場,就算李顯龍百年歸老,都可能出現成棚人民行動黨黨友推李光耀任何子孫從政,呢種要救祖宗建立嘅黨果種嘅壓力,本身係十分之嚇人,呢個亦對人民行動黨本身發展好唔健康。所以李顯揚同李瑋玲至需要呢種非常方式,保證李光耀嘅政治遺矚得到充分執行,不惜代價。李光耀嘅遺矚要求拆樓,不單好大程度上,符合李光耀回憶錄,以至佢寫嘅書裡面嘅政治陳述,亦好符合李光耀嘅個性。畢竟近年東亞地區,可以配得上柏拉圖理想國裡面所描述嘅哲王,相信李光耀係極少數嘅一個。甚至為咗保證呢個哲王體制能夠維持,不惜任何代價。

文物係要保育,歷史要保存,但面對呢種非常嘅政治狀態,可以如何取捨,呢個好有戲劇張力,但唔應該當CCTVB嘅爭產劇咁睇。呢次,係一次理念嘅鬥爭,喺傳統華人社會唔會發生,係只有仲講榮譽同光榮呢種英國傳統嘅李光耀家族至會發生。

One thought on “李光耀 v 李光耀

  1. > 如果純粹喺物質嚟講,爭嚟做乜至得架

    好難講,如果有人打算為子女爭的話……依家李顯龍出定誓章黎反駁佢地兼質疑份最後遺囑,算係押重注。

發表迴響

你的電子郵件位址並不會被公開。 必要欄位標記為 *