九巴212-min

九巴212 運吉署想點

九巴212 嘅去留問題,近排謠言滿天飛,有人話7月1日 九巴212 就走入歷史,只不過,依家運吉署同九巴,都無任何官式公布,對依賴 九巴212 出入嘅居民,完全唔知可以點。

九巴212 交俾專線小巴公司做有乜問題?

其實全世界都知道, 九巴212 嘅業績係仆街嚟,被斬係遲早問題,搵咁大架巴士去做,真係搵鬼做。其實有一間現有嘅專線小巴公司,一早向政府入紙接辦 九巴212 ,當然路線有啲改變,但肯定係向好嘅方向走。只不過運吉署竟然同申請人講,條線蝕死你,叫佢唔好申請,不論用專線小巴方式接辦,定係當年城巴12A模式接辦。九巴亦一直都好想掟走212,甚至更多豬頭骨線,因為九巴學緊日本JR咁,主力將有限嘅車經營點對點嘅特急線,在來線如果唔係政府指住佢個頭做,根本唔想做。所以依家難得有傻佬肯接走條在來線,但運吉署仲係要阻住個地球轉,究竟係運吉署想阻住某啲議員拉banner成功爭取,定係運吉署啲人個腦出咗事,呢個就連我都唔係好明點解。

只要 九巴212 路線作出適當調整,其實做專線小巴,做專利巴士都得,搵細啲嘅巴士嚟行就係,咁就可以解決大角咀一帶居民要去伊利莎伯醫院睇醫生嘅問題,除非喺可見將來政府喺伊利莎伯醫院興建一個病人唔會行到死嘅港鐵入口,否則 九巴212 嘅去留問題,係一定儘早解決,而有間公司肯衝出嚟接咗 九巴212 ,除咗解救咗九巴,仲解救埋政府,究竟政府依家個腦係諗乜嘅呢?我都十分之想知。有無運吉署嘅人,可以學創科局班撚樣覆李兆富咁覆吓我。

其實隨住香港人口老化,同港鐵嘅延伸,有唔少專利巴士線根本係要作出改變,果啲赤字線係要廢線,問題係廢線嘅安排。喺日本嘅做法,就係地方自治體或個別財團喺新幹線入咗嚟後,就接手在來線,所以依家至突然多咗一堆新嘅鐵路公司,仲要投資喺鄉鎮地區,都係呢啲公司嚟。當然日本嘅情況,係有地方政府資助原有鐵路運輸系統嘅味道。但香港有小巴呢樣嘢,巴士轉小巴都係同一樣嘢嚟。既然係咁,點解唔搵 九巴212 作為解決問題嘅起點。鐵膠嘅方法可以解決巴膠嘅問題,就係好方法㗎喇。

One thought on “九巴212 運吉署想點

  1. > 除非喺可見將來政府喺伊利莎伯醫院興建一個病人唔會行到死嘅港鐵入口

    這樣也不行,因為深旺道那邊最近的地鐵站是東涌線/西鐵線的南昌站,根本去不到伊利沙伯醫院。要出去長沙灣站才是荃灣線,其實好遠下。

發表迴響

你的電子郵件位址並不會被公開。 必要欄位標記為 *