李光耀-故居-min

李光耀 故居嘅政治炸彈

李光耀 喺歐思禮路(Oxley Road)嘅故居點處理,可以講係南洋最大嘅一個政治炸彈之一,因為 李光耀 長子李顯龍,同實際遺產執行人李顯揚以及李瑋玲嘅睇法出現嚴重分歧。而李瑋玲同李顯揚掟出個核彈級聲明,差唔多講到要流亡海外咁滯,真係南洋呢次認真大鑊。

李光耀 作為南洋克倫威爾嘅考慮

由純粹國家文物保育嘅立場, 李光耀 故居係應該保留落嚟,因為果度不單係建國國父嘅故居,仲要係人民行動黨好多大事嘅歷史現場,作為一個歷史愛好者,梗係認為歐思禮路38號有保留價值。但 李光耀 要拆,一方面有國家經濟發展嘅考慮,畢竟歐思禮路已經喺烏節路黃金地段, 李光耀 呢個人諗嘢極度實用主義,佢唔會想自己個故居阻住地球轉。另一方面,佢亦都怕佢身後個人崇拜嘅問題。李家子孫喺新加坡參政,呢個係佢地嘅公民權利,但如果長期靠 李光耀 個朵嚟選,呢樣嘢絕唔健康,所以 李光耀 為咗新加坡嘅政治發展,佢決定拆咗佢,並且由自己兩個唔從政嘅子孫管理遺產,就係怕政府介入,因為歐思禮路畢竟係私產,私產有私產嘅做法,政府要收都唔係咁容易,係劍橋大學出身,做過大狀嘅佢,佢十分清楚係點嘅一回事。

呢件事,兩邊都有道理,一個係為咗國家歷史保育,一個係為咗捍衛私產,以及維護新加坡嘅民主發展,呢個問題,最好係嚟一場國會辯論,從中搵到折衷之道,當然,呢個折衷之道唔容易搵。而嚴格嚟講,呢件事係李家嘅家事,外國人本難理他國之事,更何況呢個嚴格嚟講,係李家三兄妹嘅事,成件事真係十分之難搞。

當然可能做法有好多,但如果呢件事最終三兄妹講唔掂數,絕對係南洋政治不穩因素,特別呢次事件中立場強硬嘅李瑋玲,佢無兒無女,而且性格本身其實最似李光耀本人,李顯龍同一個性格似李光耀本人,但無任何家庭牽掛嘅人硬撼,成件事會好大件事,大家睇到李顯龍喺歐思禮路問題上,一直處於被動位置,呢次李瑋玲趁李顯龍外訪果陣至出手,更顯出佢本身都唔係純粹一個醫生咁簡單。但喺呢個時勢,新加坡政局不穩並唔係好事,作為南洋人,我期望新加坡穩定行事。

發表迴響

你的電子郵件位址並不會被公開。 必要欄位標記為 *