新土地法-min

澳門化有幾恐怖?澳門 新土地法 為例

好多人會講澳門化好恐怖,但由於澳門政府成日派錢,所以要講澳門化有幾恐怖,其實有啲難度。只不過,香港人最重視係層樓,土地投資係最重要,而澳門 新土地法 ,正正話俾大家聽,如果香港俾班工聯會嘅極左人士主政,會有幾得人驚。

新土地法 只不過係唔合理嘅土地國有化

喺香港,政府土地嘅批租時間,一般係比較長,至少五十年,而官僚審批建築工程、樓花銷售等等嘅時間,亦都喺合法範圍裡面,好多法律更唔會無厘頭有追溯權,出現清朝嘅劍斬明朝嘅官嘅異常現象,所以大家好放心去投資自己嘅積蓄喺土地之上。但係澳門,如果你以為澳門啲地炒得,咁你就大錯特錯。澳門土地批租期得廿五年,咁短本來都問題多,但更膠係,澳門啲官一向做嘢都十分之慢,歐洲拉丁語系國家果種慢,所以你買咗幅地,你隨時要用大量時間,去同政府周旋,即係批租期嘅頭幾年,塊地都係吉地,唔係地產商要囤地,係政府官員手腳慢,乜都做唔到。

好嘞,政府官員做嘢唔合理拖延,香港可以搵申訴專員,亦可以因審批慢為理由,喺renew個租期果陣順手啲,但澳門嘅 新土地法 咁出問題,因為區文龍案裡面,區文龍濫用酌情權搵銀,所以工聯關翠杏班極左人士,就借呢單案搞土地國有,總之塊地廿五年內唔發展,就算因為官僚手腳慢,都無得傾要收番,如果澳門啲官員可以廿五年乜都唔做,你無任何嘢制衡嘅話,基本上你買咗幅地返嚟,係等仆街。而更膠係,因為澳門啲法律,好奇怪有追溯期,你明明根據2003年標準批咗嘅申請,都可以要你跟2015年嘅新例重新做過,極為騎呢。所以喺澳門,你做實業,做地產都係傻仔嚟,因為啲法律由執行到立法,邏輯都唔係講常理,或講保護私有產權。所以依家有班友喺澳門買樓買出膠,隨時幾百萬心血付諸流水就係咁解。

當然 新土地法 關翠杏之所以諗出嚟,因為一二三事件後,澳門都係極左派當政,呢班友喺文革期間罕有咁打倒歐洲帝國主義分子,邊個敢郁佢地,所以條law立到無邏輯,關翠杏班友都死唔認錯。如果全東亞最左嘅共產黨,隨時澳門係其中一個。所以呢,你同人講,澳門化係買咗塊地,因官僚拖延審批規劃,搞到遲遲起唔到,但政府仲要硬收你塊地,一蚊賠償都無,呢種強搶民產嘅社會,派咗錢又點?你敢住?

發表迴響

你的電子郵件位址並不會被公開。 必要欄位標記為 *