陳婉嫻-六四

陳婉嫻 評六四 北京轉風向?

一直以嚟,土共對北京大屠殺嘅立場,都係寧左勿右。只不過,最近有兩件反映一股奇怪嘅風向,首先何君堯做咗賭撚,投票支持民主黨嘅平反六四議案。但何君堯有啲on99,所以未係一個完整訊號。但 陳婉嫻 暗批中大學生會嘅六四立場,就反映一股怪風吹緊。

陳婉嫻 放緊乜嘢風?

對認識中共黨史嘅人, 陳婉嫻 呢股怪風有兩個可能性,一係統監府打緊當年國台辦對台灣嘅伎倆,我寧願支持國民黨,團結次要敵人,打擊民進黨台獨呢個主要敵人。只要你支持國家統一,中共容忍你丙我一段時間,呢個策略可能存在,但如果係呢個策略,即係中共研判港獨呢樣嘢有人玩出火,弄假成真,依家要求收掣,亦要求土共喺六四問題上合作,至少某程度上暫時附和泛民立場,亦所謂次要敵人,因為主要敵人轉咗,呢個係其中一個可能性。

另一個可能性,係習近平攞六四問題作為權鬥切入點,亦即中共權鬥真係去到同熱普城一樣嘅大亂鬥級別,因為以往中共點亂鬥,都避免談論一九八九年嘅屠城責任,但依家習近平為咗攞到反貪嘅合法性,加上習近平老豆習仲勳,根本係趙紫陽嘅老友,亦係反映屠殺,會否係習近平順便還佢老豆生前心願,呢樣可能性都存在,習近平喺呢個權鬥階段,唔可能唔爭取番佢老豆留低嘅政治遺產,畢竟呢筆政治遺產都相當豐厚。

兩個可能性都存在,所以我依家唔落定論,因為仲需要更多資訊去解讀,畢竟 陳婉嫻 依家已經唔係土共前線嘅人馬,只不過, 陳婉嫻 縱橫政壇多年,喺中共有地位有人脈,亦知道中共嘅江湖禁忌,所以佢係講得好小心,但如果佢無收到任何北京嘅消息,或嚟自北京嘅旨意, 陳婉嫻 亦唔可能亂作評語,佢都知條街會攞住佢講嘅嘢喺度估北京嘅風向。但無論如何,依家中國政局都可能有顯著變化,同颱風登陸地點同走向一樣咁難測。如果點咁睇,何君堯投果張飛,唔係亂㩒,唔係佢on99,而係佢收到啲風,而佢解釋點解投贊成票果番話,唔係百分百嘅胡言亂語,相反,有人試圖放testing balloon。睇其他土共講乜,好快就知有乜事發生緊。

發表迴響

你的電子郵件位址並不會被公開。 必要欄位標記為 *