撕拉片-min

撕拉片 與寶麗來興衰

雖然好多人對即影即有嘅印象,年青果啲多數指Fuji film Instax,而老一啲好似我咁,多數諗Polaroid 600或SX-70嘅整合式相紙。但講真係影得好嘅即影即有,應該係被稱為 撕拉片 果堆片,以及舊款相機。其實由即影即有嘅質素,大家就明點解最終寶麗來衰落,如果唔係Polavision衰鑊甘,都係會衰落,只不過未必咁快啫。

撕拉片 至有番應有質素

我最早對 撕拉片 嘅印象,其實喺南華早報時期,因為影雜誌封面,傳統做法都係用 撕拉片 影一張test shot,okay過關至正式影落120菲林。由於當時都係用一相機去影,所以以為 撕拉片 一定係貴嘢。後嚟大批寶麗來公司1960-2003年期間生產果啲風琴機流出市面,就當然就明,原來 撕拉片 都係一般用途嘅即影即有,只不過因為風琴機操作複雜啲,包括無自動對焦,無整合閃燈,所以至由SX-70以及600系列相紙普及起嚟,亦成為咗大家對即影即有相紙嘅印象,包括果種唔多好嘅畫質。

當然, 撕拉片 有佢麻煩,最煩應該係果啲要應付Edward Land Process嘅化學液體,因為 撕拉片 包裝啲化學液體,接觸到手始終唔多好,要處置呢啲垃圾某程度上都係麻煩嚟。只不過, 撕拉片 用係真嘅相紙,微粒細緻好多,畫面亦大好多,俾到影相嘅人影真相嘅感覺,所以 撕拉片 雖然富士停咗產,但唔少人仍然好支持呢種玩法,相反,依家無論SX-70、600、Spectra定Instax,其實都係膠片嚟,仲要係影像同顏色都唔多sharp嘅膠片,再加上依家嘅即影即有,其實操作上都十分之多限制,例如光圈奇細,陽光唔夠就乜都睇唔到呢啲情況。簡單嚟講,寶麗來為咗要普及化即影即有,犧牲咗質素,當有正片質素嘅數碼相一打到嚟,就真係命都無。所以我話,就算無Polavision嘅失敗,都會玩完咪咁解。

Instax依家主要優勢夠平,同埋夠細,啲人當貼紙相嚟玩,但Instax點解取代唔到Impossible Project果啲玩逆向工程搞出嚟嘅產品,大家諗吓。依家Impossible Project大股東買咗寶麗來嘅知識產權,相信富士未必可以繼續獨大落去。特別即影即有依家變成小眾玩意,就更係。

發表迴響

你的電子郵件位址並不會被公開。 必要欄位標記為 *