六四-min-2

六四 燭光晚會爭論之中嘅邏輯同策略混亂

六四 燭光晚會,今年嘅爭論係十分之黐線,因為兩邊都係膠到無朋友,既無邏輯,亦無策略,亂七八糟,雙方都鬥派膠,睇完就火都嚟,我諗我都係最後一篇講呢個問題,免得心火太盛,畢竟條街仲有好多柒頭要打。但如果雙方啲水平都仲咁低,我可以講,共產黨只會繼續食花生。

六四 唔應該夾帶私貨

何俊仁好熟悉中共黨史,其實佢應該知道,喺六四呢個問題上,只能團結一切可以團結嘅力量,所以唯一可以做,就係將 六四 同民族認同,國籍認同切割,用中共嘅講法,就係團結次要敵人,打擊主要敵人,用標準共產黨語言係咁講嘅。但泛民次次都夾帶私貨,想乘機變成一場鞏固中國國家認同嘅大會,呢件事係啲年青人無法認同 六四 燭光晚會嘅導火線。呢種論述,係十分之得罪人,特別好多老嘢唔認同追究屠殺責任,甚至無人對付珍惜群組果堆人渣果陣。我反而,爭啲被珍惜群組班人渣襲擊。

但中大學生會一樣係on9, 六四 係一個有超級道德高地嘅事,如果講道德嘅喜馬拉雅山都無死錯人,所以 六四 悼念晚會要搞,最多另起爐灶,加入本土嘅論述,一如2008年後台灣綠營嘅做法,利用 六四 去講明依家中共幾殘暴,至少係,駛唔駛永久分家,可以揀日再論,但依家呢個形勢,港中分家,可能係對爭取追究責任係最為有利,因為就算共產黨倒台,都可能都出現類似白俄羅斯、烏茲別克嘅情況,如果係一班熟歐洲史嘅人,其實好容易玩番支聯會轉頭,攞番 六四 嘅道德高地都仲得。問題係,中大學生會呢班友,好學唔學學黃毓民果啲垃圾論述。啲人話黃毓民博學,我只能講,佢同李敖一樣,熟讀中國書,但一講歐洲美國完全係屎嚟,你跟佢玩只會玩殘自己。

六四 燭光晚會,其實最大主角,唔係檯面上嘅政客,支聯會只不過係提供人手同場地,一如我選擇呢張Feature Image,最大主角係一般仲有良知嘅平民百姓,兩邊喺今年 六四 燭光晚會嘅爭論裡面,我感覺佢地好硬膠,唔該雙方膠少陣得唔得?

Feature Image:
Sony A7
Carl Zeiss Tele-Tessar 200mm f3.5 T*

One thought on “六四 燭光晚會爭論之中嘅邏輯同策略混亂

發表迴響

你的電子郵件位址並不會被公開。 必要欄位標記為 *