卡塔爾航空-min

中東局勢急變 搭 卡塔爾航空 去歐洲玩自己執生

中東啲局勢,有時真係話變就變。中東多個國家突然同卡塔爾斷交,如果以為唔關香港人事?如果你買咗暑假去歐洲玩嘅機票,旅行團,或者你打算暑假由歐洲返香港,唔該你check吓你張機票,係唔係 卡塔爾航空 或者海灣國家果啲航空公司。

卡塔爾航空 同海灣國家果堆航空公司賣咗好多平飛

由於去歐洲直航吓吓成萬銀一張機票,而近年中東國家啲航空公司都十分之進取,所以好多六七千蚊一張去歐洲,喺中東轉機嘅機票出現。由於 卡塔爾航空 或其他中東國家嘅航空公司性價比十分之高,六七千蚊嘅機票,但係服務,以至其他水平都係一流,所以好多人同旅行社,都會訂呢啲中東國家轉機嘅機票,廉航價錢一流服務,邊個唔心動至得架。

但依家 卡塔爾航空 嘅航班,好可能因為成堆中東國家同佢斷交,飛越唔到沙特或其他中東國家上空,而搞到有問題,隨時係要航班取消,最怕係呢班中東國家互相報復,互相唔俾對方飛機飛入領空,屆時你真係乜都唔駛玩。所以,如果你張飛係呢幾日,最安全係去機場前打個電話,就算起飛咗,都最好花少少錢上Wi-Fi,留意情況,你要有飛行時間耐咗(飛入伊朗上空,最大機會),或者臨時喺歐洲某個城市要轉其他航空公司可能性。總之,你要預咗可能有delay情況。

而依家呢個局勢,唔知幾時搞得掂,美國應該會去調停,但調停呢樣嘢真係唔包生仔,特別中東呢幾個國家啲皇室、教派衝突,講緊係成個世紀嘅事,個個都係方丈,真係沒有誰比誰方丈,所以如果未買機票果啲,我建議避晒呢啲中東航空公司,有可能買因航係最好,至少因航係中立嘅。當然,經北歐同俄國航空公司轉機都可以考慮,例如芬蘭嘅Finnair,雖然我好憎俄國,但呢個形勢下,其實坐Aeroflot都唔係太差,仲可以睇吓俄國呢個國家有幾膠,特別對普京果啲瘋狂個人崇拜。

但如果中東局勢唔穩定番落嚟嘅話,中東國家航空公司嘅價格優勢,好可能就此結束,無錯,呢啲航空公司十分之平,服務好好,但旅客承擔唔起因政治因素延誤嘅情況,仲要政治因素短期內無解。

發表迴響

你的電子郵件位址並不會被公開。 必要欄位標記為 *