鮑彤-六四-min

鮑彤 比好多人都要清醒

趙紫陽嘅政治秘書 鮑彤 ,每年六四前都會接受傳媒訪問,畢竟佢真係為咗班學生受足咁多年苦。 鮑彤 今年嘅講法,係好清晰講出六四同港獨嘅關係,同時摑醒咗受熱普城病毒影響啲假本土派,以及依家主政支聯會班大中華膠。 鮑彤 唔喺香港,但佢比香港好多人都心水清十倍。

鮑彤 好清楚因果關係

政治無嘢係由石頭爆出嚟,好多嘢係有佢嘅因果關係,或者客觀社會條件,唔係某幾條蛋散嘅主觀意志可以轉移。呢個係共產黨人主要分析工具,你可以唔鍾意共產黨,但你要知佢地用緊係一套點嘅工具睇世界。 鮑彤 理解港獨嘅形成,因為佢知道中共為咗政權,喺度搞高壓,政治上一樣係作用力等於反作用力,跟住就係港獨形式。點解泛民班大中華膠,咁簡單嘅道理都唔明?所以一開始,係要團結港獨派,唔係同政權啲友一齊鬧港獨派,黃毓民呢條人渣可以有機可乘,背景就係泛民判斷錯誤。黃毓民畢竟係國民黨出身,國民黨無嘢叻,做仆街嘢最叻。國共合作,泛民呢班民族主義天真嬌會輸係正常,結果中共係拉一派打一派,你班友仲懵盛盛。

鮑彤 話中國會贏了土地,輸了人民,對中共,佢地聽唔入耳,因為佢地以為蘇聯式人口清洗同殖民可以行得通,或者台灣蔣介石式嘅清洗,都以為可以,事實上當然唔係咁,因為香港唔可以搞大規模屠殺,結果就係唔單只香港人憎中共入骨,亦會憎中國入骨(依家已經係),一旦兩者分家,或中國大亂,你諗吓會有乜結果,香港肯定變殺戮戰場,1911年喺革命軍控制區,大規模見滿洲人就殺嘅事,好大機會重演,唔多可能好似新馬分家咁,只係兩國政客間互片,而唔涉及到民眾。我之前主張新馬分家式港中分家,目的係減少傷亡,但依家已經係幾乎無可能,特別喺熱普城病毒蔓延下,混入果啲極端思想,一街都係啲羅伯斯庇爾,我真係唔知件事可以點搞落去。

鮑彤 比好多人都要清醒,佢睇到六四其實係港獨嘅因,佢亦睇到,香港好可能會出現乜嘢局面,只不過無畫公仔畫出腸,問題係,依家呢個瘋狂年代,有幾多個清醒睇問題?一係為食花生而9up,一係為自己嘅硬膠理念死頂,個世界陷入瘋狂狀態就係。

發表迴響

你的電子郵件位址並不會被公開。 必要欄位標記為 *