老闆車-min

老闆車 變成咗香港公害

老闆車 亂泊一早係港島嘅大患,只不過,一啲唔顧公德嘅仆街級 老闆車 喺唔適當位置亂泊一通,係絕對可以製造嚴重交通擠塞,呢啲仆街 老闆車 係絕對應該攞出嚟講兼且要重罰,否則好多人嘅生產力同時間就係浪費喺呢啲仆街身上,完全係唔值。

老闆車 司機有無顧及有大車轉入嚟?

好似今日下午,德輔道西近皇后街一度嚴重擠塞,車龍去到中聯辦門口,並唔係因為有交通意外,而係有架 FY 608 嘅 老闆車,泊咗喺皇后街,啱啱有架地盤大貨車要經皇后街轉出干諾道西,因為唔夠位偷入去,而 老闆車 司機同乘客都唔知喺度,亦無聯絡方法,架大貨車塞咗喺德輔道西,塞車就係咁無厘頭發生。後來因為全民藐爆,司機同一件中年肥佬至由蓮香居走出嚟,最初兩條X樣都十分滋油,兩條友見我嬲到要拍片,至急急駛走,德輔道西交通回復正常。

老闆車-min
老闆車-min

我明白香港中西區泊位唔夠,有時都侷住泊街,只不過,司機應該知道要留番位俾大車駛入嚟,特別皇后街南北兩段都係有大車駛入,一係貨車,一係巴士, FY 608 喺一個衰位亂泊,兼且仲要無留聯絡方法,無人叫拖車拖走佢架車算佢執到。依家大家明唔明,點解 老闆車 特別乞人憎,甚至有人會日日做報警X,真係日日召喚黃腳鱲去抄牌,你泊得衰咪累街坊,無論其他車主,定係一般用公共交通工具嘅市民。

我嘅睇法係,應該喺關鍵轉彎位劃為雙黃線禁區,而雙黃線違泊嘅罰款,係一般禁區違泊嘅兩倍,如果繁忙時間導致交通擠塞或混亂,甚至係十倍罰款,呢個係維護基本公共道路秩序嘅問題。當然,政府我相信唔會做嘢,所以由依家開始,如果我見到呢類違泊事件,特別係 老闆車 阻礙交通,以及的士阻礙巴士站上落,一定影相,公布天下,政府唔處理交通秩序嘛,咁只有市民自己去理。果啲特別仆街,成日亮相嘅司機,直頭要起埋底,要佢地付出違泊嘅額外成本,否則真係我睇唔到喺政府唔做嘢嘅情況下,點解決呢啲仆街到無朋友嘅司機。

當然,我認為係需要更多停車位同停車場,香港有啲嘢,仍然必須用車嚟運。而喺的士仆街,鐵路overload情況下,唔揸車,你可以點?只不過特別無公德嘅司機,係必須處理就係。

發表迴響

你的電子郵件位址並不會被公開。 必要欄位標記為 *