IQ博士-襲警-min

IQ博士 遲早喺香港禁播

香港啲黑警,同理周融班仆街都好似方丈,學校通識講黑警集體爆粗,即刻走去搞人,搞到大家以為黑警係御准爆粗。只不過,如果黑警嘅邏輯咁發展落去, IQ博士 遲早喺香港禁播,如果真係搞到 IQ博士 喺香港禁播,我相信黑警同周融會又一次累香港人柒出國際。

IQ博士 成日都有襲警場面

如果講最多襲警場面嘅漫畫,未必係香港牛佬嘅《古惑仔》,亦未必係日本果啲黑幫漫畫,而係 IQ博士 , IQ博士 嘅小雲,其中一項嗜好應係襲警,天神村啲警車遇到小雲,十之八九都會報廢,如果小吉肚餓仲大鑊,小吉應該會食晒架警車,渣唔會有得剩,我懷疑果兩個一高一矮嘅差人被派到天神村駐守,應該同守水塘差唔多,因為每次遇到小雲,車都散埋,正常嚟講應該入埋醫院,遇到小雲仲大鑊過遇到果兩個籮柚生喺個頭上嘅外星人。而喺天神村,襲警係無後果,未聽過則卷千平博士要賠架警車(但有可能啲警車都係佢老人家修理),而小雲未有任何監禁紀錄,你話 IQ博士 仲唔係全世界最鼓勵襲警嘅動畫。照周融啲五毛邏輯,依家啲香港人咁唔尊重警察,咁鍾意襲警,因為細路果陣睇得太多 IQ博士 ,咁都唔係要禁播 IQ博士 ?

依家黑警,同土共有乜問題,就係佢地做果啲嘢,有違邏輯,亦都有違道德甚至法律,但佢地死都唔認,個個都頭文字D咁,將啲邏輯係咁飄移,林慧思鬧警察執法不公就攞去批鬥,差佬自己集體爆粗就千方百計阻止學生去思考當中是非對錯,簡單嚟講,土共同五毛就係拳頭就係真理,當權者乜都得,平民百姓有違當權者意就乜都唔得。

所以我好想睇,幾時 IQ博士 會喺香港搞到被禁播,大家都知, IQ博士 屬於膠系動畫,基本上,周星馳果啲無厘頭嘢,都係好有 IQ博士 嘅影子,我呢代人成長果陣,對膠呢樣嘢嘅啟蒙,好大程度上係嚟自 IQ博士 ,因為 IQ博士 可以將啲荒謬情景推到好盡,所以我自己寫南洋政治果本書,係用天神村嚟形容南洋政治都係咁解。 IQ博士 喺一個自由開放社會,可以好自由嘅存在,但如果香港變成一個黐線極權社會,就睇 IQ博士 都會有罪。所以幫港出聲,同埋HKGPao必須喺香港消失,就係咁解。

發表迴響

你的電子郵件位址並不會被公開。 必要欄位標記為 *