AutoTrac 3 程式設計傻的嗎?

Factwire攞到一份聲稱嚟自PCCW嘅文件,指 AutoTrac 嘅主機要定期reboot,每兩個禮拜都要reboot一次,至可以維持系統正常運作。我初期睇過蘋果日報刊登Factwire文件嘅內容。我睇完之後,我只會覺得,成個 AutoTrac 3系統真係去到一個傻的嗎嘅程度,根本唔可以接受。

AutoTrac 3 行 JVM Server 唔炒就怪

成個 AutoTrac 3嘅問題,其實出喺個 JVM Server,根據PCCW 文件所述,當監控到Java虛擬機器嘅伺服器所使用的記憶體超過2.5GB時,就要重新啟動,確保系統正常運作。咁好明顯出咗兩個問題,首先,Java係唔係適合航空控制塔控制呢啲咁關鍵嘅應用,呢點我好有保留,唔少公司都用Tomcat,或者Java EE,但唔少公司都係因為Java穩定程度有問題,開始改用其他嘅語言。

就算Java未必有問題,但可能因為雷神公司成個系統嘅記憶管理出咗事,所以至搞到每兩個禮拜reboot一次,正常嚟講,一個企業級應用,係唔應該出現要定期reboot嘅安排,因為企業級應用係預咗唔可以reboot,或者只有好非常嘅情況下至reboot,更何況AutoTrac 3講緊係一個關鍵程度應用,點可能會需要reboot嘅呢,呢方面,我認為係十分之匪夷所思。

依家大家點明,點解 AutoTrac 3炒完粉又炒粉,救嚟救到去救唔掂,因為選擇嘅程式語言,或者撰寫程式嘅方法,全部都係事已出,政府點解仲可以容忍雷神繼續咁樣玩落去,咁樣遲早只會玩死全世界。所以,民航處唯一可以做嘅,係立即搵取代 AutoTrac 3嘅系統,而唔係繼續用呢啲騎呢方法,呢啲騎呢方法,喺航空層面係唔可以接受。我唔係話一定要用C語言寫至可靠,但Java Virtual Machine係咪可以肩負重任,值得懷疑。

發表迴響

你的電子郵件位址並不會被公開。 必要欄位標記為 *