independent-min

星期日休息 :擺脫老屎忽嘅 獨立記者 精神

我一條友決定去東京搵梁振英DTZ Japan交易真相,其實係一件好奢侈嘅事,東京食住行都唔係平。對我嚟講,呢次行程嘅旅費,連上次大阪行,我只係籌措到四千蚊左右,我係貼咗好多錢落去(其實要籌多八千銀,至叫收支平衡)。但為咗擺脫老屎忽嘅控制,做一個真正 獨立記者 ,呢次行程係示範俾大家睇,新聞記者係要擺脫果啲新聞機構嘅自我審查,互聯網或者係一個最好嘅年代,如果讀者肯將睇傳統傳媒嘅錢,投放喺 獨立記者 身上。

獨立記者 就係對袁志偉呢啲仆街嘅回應

對好多有心記者嚟講,佢地或者都想去日本查梁振英,但好多時,問公司攞錢攞假,你想像一下,你老闆係袁志偉一類嘅人渣,首先肯定唔會批成萬銀嘅budget俾你,另一方面,你條古仔一定出唔到街,跟住要你跟番啲垃圾古仔,或者中聯辦點你做嘅古仔,呢個就係好典型香港傳媒工作者,每日都要面對嘅苦況,你幾有理想,壯志都會磨滅。如果用馬克思嘅理論,當生產工具唔喺你手上果陣,你仲講乜 獨立記者 。

而依家我走去自己做調查,當然好高風險,你睇梁振英點對付梁繼昌就知,但問題係,如果作為記者唔自己走出去,結果就係中聯辦繼續可以為非作歹,真相永遠收埋喺啲當權者手上。所以呢啲嘢,我決定自己郁手去做。要防止香港傳媒沉淪,唔係只係做鍵盤戰士,就可以防止。鍵盤係重要,因為你要用鍵盤寫,你要用鍵盤去起server,去將server嘅表現做到最好,呢啲功夫永遠都要做,但除咗鍵盤,除咗日日口嗌傳媒沉淪,要實際行出第一步,唔係只係有事圍爐取暖就算,甚至有啲收課金嘅所謂傳媒,收咗課金去執行中聯辦嘅任務,你仲以為佢抗緊共,呢啲真係黐線到極點。

我一直無太大批評眾新聞,呢次如果無眾新聞拋出DTZ Japan嘅問題,我諗我唔會開DTZ Japan呢個file,所以一眾網媒中,我對眾新聞係有敬意。對於Factwire,有時我都會睇完佢地嘅調查,接手查落去,或者再拼合其他檔案,所以呢兩間,我唔會太大批評佢地。但有啲網媒,最鍾意係不問自取,一字不漏抄晒人地嘅成果,呢啲抄報真係同content farm差唔多,所以我喺呢次採訪行動,講明抄報,一係俾番backlink credit,一係捐助少量,參與行列,否則就真係自己爭取讀者share好過,呢啲抄報對 獨立記者 嚟講,其實係最大威脅,因為佢地可以攞人地嘅嘢,唔做分析,唔做整理,但google adsense廣告費照攞,甚至仲有面去爭取捐款,講句難聽啲,呢啲抄報係餓死 獨立記者 凶手之一。

當然,梁振英嘅調查行動未完,所以我仍然接受大家嘅捐贈,但如果你用credit card,又係有香港信用卡,用HSBC Payme可能好過Paypal,因為Paypal嘅手續費係太貴,少量捐款尤其係,如果你係用香港信用卡,用HSBC Payme好過。如果你想係無腳毛下捐贈,其實最好係喺恆生或者花旗銀行嘅ATM機入現金,因為最少腳毛可以留低,能夠最大可能保持匿名性。我希望介紹呢啲方法,其他有心 獨立記者 都可以慢慢自己去學習呢類手法行事。

傳統傳媒當唔再代表人民講說話果陣,係時候俾佢地完成任務退休,紙媒係唔需要一定生存落去。

發表迴響

你的電子郵件位址並不會被公開。 必要欄位標記為 *