一番賞-min

一番賞 都冚,不如冚晒啲扭蛋機

啱啱到東京,如果讀者都知乜事。但一落機已經要處理啲荒謬新聞,信和有間嘢,因為賣 一番賞 被人冚。其實 一番賞 簡單嚟講,就係類似扭蛋嘅嘢,但某大報業集團嘅記者同編輯,對 一番賞 係乜一知半解,就講到係違反香港對抽獎相關事項嘅規管,因此搞到警方過嚟落鑊,如果咁都得,以後香港仲玩乜嘢Yes Card,第一個拉X咗倪震先。

一番賞 點可能係彩券

首先, 一番賞 係乜,其實都係扭蛋邏輯,只不過,扭蛋你要入錢,用自己嘅力扭隻蛋出嚟,係純機械操作,而 一番賞 ,你自己喺一堆咭抽一張,然後按咭上嘅顯示,換相關嘅玩具同公仔。所以我話,呢樣嘢根本係同扭蛋、Yes! Card係一樣嘅嘢嚟,我唔明點解要冚咗佢。

我唔知律政司班友係咪得閒得滯,定係袁國強資深大律師臨退休五行欠緊啲嘢,但基本上,如果認真去研究《賭博條例》釋義嘅部分,如果 一番賞 係彩券,咁真係十分之大件事,咁好多嘢都可以被定義為彩券,然後冚咗佢,根據《賭博條例》,彩券包括咗抽獎、馬票、字花、紅票、鋪票、同埋任何經抽籤或碰機會而分發或分配獎品的博彩遊戲、方法、設計或計劃。

問題係 一番賞 根本唔係分發或分配獎品, 一番賞 可以成套買,只要你俾一個指定價錢,呢個可能比Yes! Card或者扭蛋更加唔講運氣,因為你肯俾錢,係可以唔駛一路等機會玩齊成套返嚟。呢樣嘢,一直有人由日本攞返嚟香港玩,點解依家突然有傳媒集團,正氣上身,認為呢啲 一番賞 係違反《賭博條例》嘅賭博,究竟成件事,有幾影響社會風氣。如果唔係突然間警方走去拉人封艇,我真係唔知乜嘢叫 一番賞 。依家冚 一番賞 ,不單激嬲年青人,甚至連我呢啲步入中年嘅人,都認為成件事有無搞錯。如果咁都要冚,咁不如警方先搵倪震問話先,佢當年賣Yes! Card賣得幾揚,我呢個年紀嘅人,邊個唔知道或者未抽過Yes! Card先。

至於搞出呢單嘢嘅報業集團,由今日起,本人與之不會有往來,包括接受訪問,呢類傳媒,本人恥與為伍。得閒就查梁振英喇,麻鷹唔捉捉雞仔,正契弟嚟。

One thought on “一番賞 都冚,不如冚晒啲扭蛋機

  1. 政府自己所做的事情就係最邪惡時,能夠表演自己”正義”一面的方法,就係捉呢D雞毛蒜皮的事來立功。

發表迴響

你的電子郵件位址並不會被公開。 必要欄位標記為 *