東航-min

東航 機師九流技術累街坊

正常嚟講,黑雨唔會搞到香港機場停頓,因為香港機場可以用儀器輔助降落,只不過, 東航 由南京去香港飛機,竟然滑咗入跑道,搞到北跑道停飛,香港機場交通一鑊泡。當然,相關損失,按國際規矩都係 東航 找晒。只不過,呢次又一次反映中國嘅民航安全係幾咁有問題。

東航 機師同控制塔溝通九唔搭八

有聽ATC通話嘅人,都見識過唔少中國機師啲英文水平,去到九唔搭八級數,如果唔係依家啲器材夠先進,就空難咗十世。但無論如何,中國無理由任由啲機師英文水平唔掂都繼續飛國際線,飛國內線英文唔掂都算,反正有事中文搭夠,但飛國際線,你唔可以指望控制塔人員可以同你講華語,特別香港嘅控制塔,係完全無用華語嘅傳統。而呢次 東航 機師明顯聽唔明控制塔講乜,英文更加講唔到,所有飛機可以緊急重飛,係香港民航處人員專業,兼且啱啱好AutoTrac 3無壞,如果AutoTrac 3出事,我真係諗唔到可以幾膠。我相信,第一件要調查嘅事,就係點解俾班英文去到垃圾級別嘅友仔, 東航 照俾飛香港,係咪當中有涉及官二代嘅問題,因為大家都知,國際線嘅機師,無論待遇,定好多方面都係好啲,至少有機會出國。

當然,另一個重點亦係好重點,就係點解架 東航 客機可以滑出跑道,話雖早上十點幾好大雨,但大雨降落滑出跑道呢樣嘢,真係十分之匪夷所思,究竟係果個鐘數唔適合降落,定係 東航 負責降落果位機師訓練有問題? 東航 如果啲正副機師都係技術上唔夠班,其實坐中國啲航空公司都係玩命行為,隨時仲衰過台灣華航以往有名嘅維修差勁,加上機師態度有問題果種情況。但如果有得揀,你又要侷住去中國嘅話,我會話你坐因航都好過坐 東航 或者中國國際航空,因為呢堆航空公司,管理人事上完全係不知所謂,機票價錢事小,玩死自己事大。

另外,呢次唔少人因坐廉航而中伏,唔少廉航任由乘客喺跑道坐幾個鐘唔知做乜春,跟住啲機組人員working hours過晒鐘,至叫乘客離開飛機,呢種態度完全唔係路。有啲廉航,特別同中國資本有關果啲,應該bad list咗佢,太多人中過伏喇。

發表迴響

你的電子郵件位址並不會被公開。 必要欄位標記為 *