丁蟹-梁振英-min

你想 丁蟹 嚟繼續搞亂香港嗎?

好多人都唔明點解,梁振英被比喻為《大時代》嘅 丁蟹,因為過去四年幾嘅統治,最多係語言偽術,但未去到 丁蟹 水平。但依家梁振英喺UGL事件上嘅暴走表現,不單越嚟越似 丁蟹 ,就連啲土共,就變晒幫 丁蟹 為虎作倀果五蟹集團成員。如果唔快啲嚟個大奇跡日,將呢啲人渣一嘢KO,睇嚟香港人真係有排煩都似,甚至真係會出現 丁蟹 繼續治港嘅噩夢。

丁蟹 同梁振英一樣係顛倒是非黑白

好似梁繼昌,其實係追擊UGL事件嘅英雄,而梁振英同周浩鼎醜態,簡直係百出。如果喺一個正常嘅民主社會,周浩鼎一早踢出政壇,永遠收山,而梁振英,一早應該受到刑事調查,根本唔會仲喺特首府果度作威作福,仲可以指揮馮煒光呢條契弟胡作非為(我只能講,除咗契弟,無其他更準確形容詞,形容依家馮煒光嘅角色)。

但依家香港進入 丁蟹 治港嘅年代,本來應該get out係周浩鼎,但依家土共係千方百計,要濫用不信任動議要迫梁繼昌離開調查委員會。如果土共咁都得嘅話,係唔係要全香港對呢啲議員都玩不信任行動,例如好似梁美芬咁,就搵晒佢同果啲業主立案法團、業委會蛇鼠一窩,搞到應該有小巴線無小巴線,甚至包庇同縱容圍標呢啲行為出嚟,擺晒出街,睇吓廉政公署跟唔跟進呢啲人。我相信依家包庇梁振英呢班五蟹集團成員,根本係無個乾淨。如果呢件事可以持續落去,香港再無是非黑白觀念,就會好似中國咁,全國都係恃惡行凶嘅 丁蟹 。

丁蟹 治港係點嘅一回事?你想唔想變成《大時代》一劇中嘅方芳、方婷同方敏。大家要記住,《大時代》一劇嘅情節,係劍指毛澤東治下嘅文化大革命同中國。點解方家搞到咁慘,同方進新嘅和理非非係十分之有關係。《大時代》最後結局係,唔係純粹大奇跡日,而係方展博同陳滔滔,聯手喺股票市場上以牙還牙,以眼還眼,迫到丁蟹一間五件人渣全部去跳樓。香港人咁鍾意睇《大時代》,但完全無辦法喺《大時代》當中對照當前嘅形勢同對應,唔怪得TVB依家拍嚟拍去都係一啲白痴劇,因為啲人由煲劇到睇新聞,都唔用腦,亦唔去行動。但可以肯定係,如果依家仲撐梁振英果啲中坑,你小心呢啲人其實都係 丁蟹 。

發表迴響

你的電子郵件位址並不會被公開。 必要欄位標記為 *