京都-唐宋-1-min

京都 即唐宋文明之所在,何需認賊作父?

過去二十幾年,我一直無去過中國,對我嚟講,我一向唔認為用殘體字,喺文革期間大肆破壞文物、文明嘅中華人民共和國,係中華文化嘅傳人。甚至容我講絕一啲,直至1945年至第一次受外族統治嘅日本,有可能至係唯一有資格講自己係唐宋文明嘅傳人。大家睇吓 京都 東福寺一塊大正六年(1917年)嘅維新志士紀念碑,就明。

當中華民國磨刀霍霍否定古文,日本人仍然珍而重之

京都-唐宋-2-min
京都-唐宋-2-min

1917年,大清帝國嘅帝制已經推翻,所謂新文化運動亦醞釀當中。呢個時候,日本已經係世界強國之一,大韓帝國亦被強行併合到日本,但當時日本政府,撰寫維新志士紀念碑,仍然係用唐代流行柳公權體刻碑,全文碑文,唔見任何一個日文字母,相反,你問現代日本人睇唔睇得明碑文寫乜,或者未必得,但如果你有一定古文修養,你係可以解讀到當中嘅意思。日本唔再係中國嘅任何附庸國,但日本比起中國本土,更尊重呢啲唐宋文明。一如最尊重大清帝國翰林學士,竟然係英國喺香港嘅政府一樣。

其實對好多所謂了解中華文化嘅人,京都、奈良兩城係一個平行時空嚟,如果唔係宋亡於蒙古人之手,長安、洛陽、臨安等地會係乜嘢風景,就係今日嘅京都、奈良,甚至比京都、奈良更具氣勢,因為京都、奈良本身都係將中國原有參照城市,亦即長安、洛陽縮細嚟做。甚至今日京都仍然有一區叫做洛陽,但今日中華人民共和國河南省洛陽,又係唔係大家讀古書所想像到嘅洛陽,我可以講,肯定唔係果回事。一如日本茶道,飲抹茶係本來宋王朝果陣嘅飲茶方法一樣。

所以我對所謂華夏聯邦,我係否定,如果你真係講華夏文明,邊個係華夏文明真正代表,其實一講就係日本,咁點解當年要打抗日戰爭,唔係應該以保留中華文明精髓為理由,支持同日本併合?喺中華文明嘅角度,反對日本可能係更加解唔通,因為蒙古帝國,以至大清帝國對中華文明嘅破壞,其實將明清以後嘅建築設計,同京都奈良保留嘅唐宋設計相比,就已經一清二楚。保留中華文明,只要做好香港自己即為保留中華文明而盡力。同事奉俄國嘅中華人民共和國合一,至係欺師滅祖嘅行為。

本文相片由本人所攝
Sony A7
feature image: Carl Zeiss Tele-tessar 200mm f3.5 T*
碑文照片:Carl Zeiss Makro Planer 60mm f2.8 T*

發表迴響

你的電子郵件位址並不會被公開。 必要欄位標記為 *