香港政府-腐敗-min

星期日休息: 腐敗 緣何喺香港捲土重來?

喺呢個禮拜嚟講,香港新聞最主要主題,應該係 腐敗 ,由周浩鼎喺UGL案上受梁振英指揮,到港珠澳大橋偷工減料,到民航處撻朵喺長榮航班度升級,全部都係形形色色嘅 腐敗 。喺英治年代, 腐敗 得到咗有效控制,點解依家香港嘅 腐敗 又捲土重來?呢股 腐敗 之風,同以往英治年代果種喺基層滋長嘅 腐敗 作風好唔同,香港呢次嘅 腐敗 風係同葡萄牙人治下嘅澳門一樣,係一股由上而下嘅力量,如果香港人無法控制呢股力量蔓延,香港所謂嘅廉政,好可能只係一種假象。

英治年代嘅 腐敗 同中治年代腐敗嘅唔同

喺上世紀六七十年代,葡治嘅澳門,同英治嘅香港,一樣都出現 腐敗 ,喺亞洲國家,真係無幾個可以同腐敗絕緣,除咗由李光耀治下嘅新加坡,幾乎係極少數嘅例子。但英國統治下嘅香港,同葡萄牙統治下嘅澳門, 腐敗 大家都有一定分別,喺葡萄牙治下嘅澳門, 腐敗 幾乎係由上而下,連澳督都貪污,你話下面啲公務員唔貪污,真係無乜可能。但英國文官本身,喺香港貪污唔多,連英國人都貪污係警隊,一方面,喺華人社會,涉及公權力運用嘅貪污,都會涉及大筆金錢,好多英國人都唔易抵受金錢誘惑。另一方面,英國好多嚟香港做警官,自己都係唔算受教育多嘅精英,好似葛柏,如果佢唔嚟香港,佢仍然只係一個英國小鎮嘅警官。所以英國管治年代,上層嘅部門,係至少維持到,就算有 腐敗 情況都唔會太離譜,否則麥理浩一條友,就算有民意充分支持,都唔可能用近乎MI5嘅手法去打擊貪污。廉政公署首任執行處長彭定國,係警隊政治部(special branch)同MI5出身,大家可以諗到點解廉署嘅手法,點解可以辣到呢個程度。

但中治年代嘅 腐敗格局,就有啲似葡治澳門嘅情況,大家睇番喺中治年代貪污嘅官員,曾蔭權年代有許仕仁(政務司司長),曾蔭權本人,喺梁振英年代,UGL案係乜,梁頌昕喺機場濫用權力案係乜,大家都心知肚明係乜嘅一回事。無錯,基層公務員普遍未敢去到收茶錢嘅地步,就算有人想咁做,有人擺上facebook,條友都實死無生,唔可能玩落去。但取而代之,就係高層果啲「大茶飯」,果啲普羅市民接觸唔到文件有關嘅貪污腐敗,當上層都流行呢種遊戲果陣,慢慢滲落下層就變得好合情合理,好似民航處啲人可以咁撻朵,或者港珠澳大橋喺文件上做假,呢啲咪係上層嘅文化變質,跟住一路路影響到中高層嘅公務員,甚至依家問政府申請funding,會唔會涉及一啲貪污腐敗嘅情節,我依家都覺得十分之難講,因為依家貪污嘅源頭,並唔係基層公務員,而係政府嘅最高層。

腐敗 好可能要靠短暫歸英去解決

獨立係唔係一個解決呢個問題嘅方法?如果香港係由一個類似李光耀、克倫威爾或者戴高樂咁嘅強人去領導,或者有啲機會,但李光耀、克倫威爾或戴高樂呢種人,出到嚟係運氣,而且要遇上非常時勢至會出現,唔計議會軍領袖克倫威爾MP,李光耀同戴高樂將軍,都係二次大戰嘅產品,李光耀幾乎命喪樟宜嘅亂葬崗,而戴高樂將軍要流亡英國,再領導法國人,憑藉海外領土光復法國本土全境,我唔認為香港會出現呢類型嘅人物,同埋靠呢類型人物撥亂反正,太有柏拉圖果種期望哲王嘅味道,哲王統治係唔係一個解決問題嘅方法呢?我個人並唔認同。

共產黨只會想呢種腐敗維持落去,一如葡國人離開澳門後,政府高層嘅腐敗,根本無離開過澳門一樣。香港比較好運,香港對上一個宗主國英國,係本身都唔多容忍到貪污腐敗,如果香港短暫歸英,或者可以將政府高層果啲貪污勢力清除,當香港比較乾淨後獨立或者變成自治領,相信情況會有希望有所改善。

只不過,要徹底解決呢個腐敗問題,仍然要靠香港文化嘅革新,正如李登輝所講,需要係心靈改革,文化改革,掌握權力嘅人,有權力嘅價錢已經充分反映喺佢嘅薪水之上,唔應該再貪圖非份報酬嘅諗法。喺基層公務員,呢種諗法仍然係存在,但喺中高層公務員,除咗官商勾結,齋靠果十幾萬糧係唔係一種出路?定係需要高級公務員可以喺退休之外,有更好出路,例如出戰國會,或更上一層樓,成為受民意授權嘅問責官員,實際負起管治嘅任務?呢個問題,似乎係應該儘早開始討論。

發表迴響

你的電子郵件位址並不會被公開。 必要欄位標記為 *