民航處-長榮-min

民航處 同長榮嘅共同崩壞

民航處 可以講係香港最早投共嘅前英治年代存在政府部門,樂鞏南同林光宇都係投共投到爆,當然,同 民航處 過往受英國人歧視有關。只不過,依家 民航處 呢個專業部門,已經腐敗到一個匪夷所思程度,好可能危害航空安全。 民航處 一個私人台灣團,竟然喺長榮航空面前玩撻朵,令空管人員當中三位升級商務客位,仲要乘機因此指揮香港控制塔,要一個好啲嘅航線同高度,節省燃油同時間。

民航處 近得中國人多就敗壞

呢件事,喺熟悉台灣嘅人嚟講,反映咗長榮航空喺張國煒因家族權鬥離開後嘅敗壞。張國煒係少數有正機師資格,同埋飛機工程師資格嘅航空公司管理人員,因為張國煒自己係專業出身,所以至令張榮航空選擇加入要求相對嚴格嘅星空聯盟(Star Alliance),亦因此,長榮嘅內部管理係比華航好,但張國煒一走,乜嘢怪事都發生。如果呢單嘢屬實,就反映咗張國煒離開後嘅長榮航空迅速敗壞,如果俾我揀飛去台灣,可能侷住要坐番因航,至少因航唔可能容忍呢類事情發生。

民航處 之所以會學撻朵呢套次文化,其實就係呢個部門嘅人,長年累月接近中國人嘅結果。由樂鞏南開始,邊個 民航處 有番咁上下級數嘅人,未去過中國搞果啲統戰活動,或者退休之後,喺中國政府或中國嘅公司做嘢?呢啲潛移默化嘅事,足以令一個本來以英國NATS為師嘅政府部門,仲要係專業部門變得不知所謂。特別依家機管局亂批啲無客嘅航班用香港機場,航空公司為慳油等因素,係好有誘因故意討好控制塔人員,如果長榮航空咁都可以無事,之後好多亞洲航空公司有樣學樣,香港空域仲唔亂過亂世佳人就怪。

當然,呢班友有恃無恐,亦因為依家空管呢個領域唔開放,其實空管同醫生一樣,長期缺乏人手,要解決呢個問題,香港唯一可以做係開放英聯邦空管人員,並且由英國、澳洲、紐西蘭甚至新加坡挖角,只不過, 民航處 班友死人都唔咁做,喺唔夠人手下,你話廉署以公職人員行為失當拉晒呢班友都好,敢唔敢停呢班友職務,我怕屆時香港空域更混亂。所以空管人員人手呢個問題,一定要儘早妥善解決,否則真係有排煩。

發表迴響

你的電子郵件位址並不會被公開。 必要欄位標記為 *