GTA-min

香港道路 GTA 化

香港人揸車揸到 GTA 咁,相信呢樣嘢,好多人都有咁嘅感覺,只不過,一直無好實質證據去證明,香港嘅路面已經變咗 GTA 世界。只不過,清水灣道瘋狂撞行人事件,到牛池灣行人膠車禍,到呢單,有人揸車揸到以為自己藤原拓海咁,由於依家人人有車cam,車cam嘅記錄upload晒上網,大家至可能見識到依家香港嘅道路可以有幾 GTA 化。

GTA 都未必有咁喪

講明在先,我係打機白痴嚟, PS3, PS4 一概未打過,我嘅手腳協調能力,一向都唔係好應付到遊戲機,但都知乜叫 GTA(喺iPhone都打過吓),如果喺虛擬世界,大家點亂揸,呢樣我唔理,打得機,最緊要係過關、攞分同勝利。但現實道路,你對其他道路使用者有嚴格嘅責任(strict liabilities),咁揸法,我唔知喺入鏡之前,架車發生乜嘢事,但如果兩名司機嘅運氣稍為欠佳嘅話,我相信一早已經係一場大車禍,甚至有人打直入打橫出,而唔係大家喺度食花生。電影特技人係做足安全措施,但你自己揸車,你嘅安全措施,只係適用於你以正常方法揸車,而唔係揸車揸成咁,我真係好懷疑果位司機個牌係點考返嚟。

如果講駕駛技術,我係白痴,要請教,一係請教林鴻達,一係請教林忌,但作為一個駕駛技術只係攞到牌,大部分時間使用公共交通工具嘅普通市民,我對香港司機嘅駕駛態度,係越嚟越不安,有時係,意外唔係因為你唔夠安全,而係其他魯莽司機,甚至行人喺道路上任意妄為。而依家香港嘅道路,俾我感覺就係無政府狀態。再加上果啲,佢地嘅駕駛執照,隨時係以行賄方式買返嚟嘅中國司機,你真係敢喺香港揸車?我真係無呢個能力同膽量,長期保持高度警覺性,喺香港呢個道路設計亂七八糟嘅地方揸車,喺香港要享受「駕駛樂趣」,我真係無福消受。

香港一定係一個越嚟越膠嘅地方,但膠係一回事,膠到攞命呢樣嘢就太過嚇死人,我相信香港需要一個建立正確駕駛品德嘅運動,至少司機係知道,自己揸車係承擔幾大嘅責任,同埋要點樣至叫妥善履行作為司機嘅責任。只不過,短期內香港道路都係一個危機四伏嘅地方。

發表迴響

你的電子郵件位址並不會被公開。 必要欄位標記為 *