Trump-打字機-min

膠觀點: Trump 禁止帶notebook上飛機有助打字機復興

近日有傳, Trump 打算將禁止入美國嘅飛機帶手提電腦嘅禁令擴大,係全世界入美國嘅飛機,都唔可以 hand carry 手提電腦,相信iPad Pro都難逃厄運,因為都係同一類嘢。相信如果呢項禁令一出,有一樣嘢會突然復興,無錯,一如圖中嘅手提打字機。圖中呢部Olympia Travller de luxe,係四十年前Thinkpad級嘅物件嚟。

Trump 有助重振美國打字機產業

由反恐角度,手提打字機好安全,當然當中無任何暗格,無任何電子元件可以啟動炸彈,唔會用任何鋰電之類危險物質,唔駛打開都可以睇到裡面有乜,又無無線電波干擾,最多集體打字果陣,成架飛機好嘈,但點嘈都嘈唔過飛機嘅噴射引擎。而且一旦有真恐怖分子襲擊,是但乜人都可以攞住手提打字機一嘢車落啲恐怖分子度,正所謂官府在遠,打字機在近,呢個真係大大提升前往美國航班嘅保安水平。

而且依家中國都唔出產打字機,依家反而大部分電腦係由中國生產,而打字機嘅工人,好多仲喺美國,快啲製造大量手提打字機,然後喺各地機場嘅免稅商店果度發售,立即令美國嘅就業水平改善,你話有幾好至得。

當然,唔好話鼓勵人人用打字機,對一般平民百姓嘅私隱無好處,因為NSA係唔可能偷到你打字機上打過嘅任何嘢,除非明搶,呢個可能係由KGB學返嚟嘅智慧,據聞俄國情報部門同政府仍然有保留打字機,最機密嘅文件唔係用電腦保存同傳送,而係用打字機打喺紙上,然後睇完就碎咗,幾乾淨俐落,保證唔留有任何痕跡,呢種俄式智慧好值得學習。

所以大家最好快啲喺etsy、dcfever、ebay,甚至鴨寮街,搵番部二手嘅手提打字機返嚟練習,話唔定日後真係全部去美國嘅航班都唔准帶電腦果陣,你果十幾個鐘就係陪住部打字機係咁打字機。據聞以前啲人,普遍有施展一陽指嘅能力,因為依家啲電腦鍵盤太軟,根本唔駛力打都得,依家重新提倡打字機,唔練鋼琴嘅都有番咁上下指力,可能有助振興一陽指呢種武功,甚至發展一陽指喺MMA上嘅運用,你話幾好呢。 Trump 真係用心良苦。

發表迴響

你的電子郵件位址並不會被公開。 必要欄位標記為 *