郊野公園-min

梁振英同香港人有仇要搞 郊野公園

似乎梁振英要下定決心毀滅 郊野公園 ,當規劃署唔肯郁 郊野公園 ,梁振英就搵由梁粉把持嘅法定組織房協研究破壞 郊野公園 ,以俾年青人有住為名,實際上係為中國嘅土豪服務,實在十分之無恥。點解我會講毀滅 郊野公園 係為土豪服務。

國際城市可以自然與都市並存

其實香港作為一個自然與都市並存嘅大都會,香港人應引以為傲至係。喺亞洲,另一個做到呢樣嘢,就係影呢張相嘅地方,香港人最鍾意去嘅日本京都。日本京都一定係國際城市,甚至京都無自己嘅國際機場,京都係同大阪共用一個國際機場。京都嘅樓宇,除咗京都塔周邊地區,全部有高度限制,而京都基本上,係郊外同城市融合喺一齊,但正係咁,京都至吸引咁多遊客,甚至唔少人慕名住喺呢度。如果無英國人當年嘅 郊野公園 規劃,香港除咗會不斷出現山泥傾瀉問題,死人無數,山邊嘅地完全住唔到人外,以英國人接收香港果陣,山頭光禿禿嘅情況,香港嘅城市景觀將會十分之核突,同中國以至好多第三世界國家無分別,你仲認為會有依家嘅世界級海港景觀?

其實梁振英搶 郊野公園 地,都係為中國人服務,中國啲土豪破壞咗自己原來居住嘅地方,又想留喺中國吸乾啲民脂民膏,但又想享受一流嘅戶外景緻,配合佢地暴發嘅財富,所以用研究公屋用地為名,呃香港人答應開拓 郊野公園 ,跟住陸續將果啲中國富豪心目中嘅靚景點劃入土地發展之中,香港 郊野公園 保護集水區嘅功能喪失,就要買更多東江水,而最後結果係,香港最好景緻,保護得最好嘅地方,都俾中國啲土豪買晒,然後破壞殆盡,就算日後香港有幸獨立或歸英,趕走呢班中國人,剩番都係一個難搞嘅爛攤子,呢個就係香港人必須面對嘅殘酷現實。

所以我睇法十分之清楚,就係 郊野公園 寸步不讓,為子孫,為香港嘅水源安全,為香港嘅美好景緻,為半山居民安全,梁振英同佢合作嘅賣港賊,一定要起出佢地嘅刑事犯罪證據,香港告唔到,就交俾第二個國家去告,一如UGL案,香港律政司唔做嘢,就由澳洲同英國嘅執法部門做嘢。對呢啲破壞香港子孫生存環境,破壞香港美景嘅人渣,無寬恕餘地。

本文照片喺京都東福寺拍

Sony A7 + Carl Zeiss Tele-Tessar 200mm f3.5 T*

發表迴響

你的電子郵件位址並不會被公開。 必要欄位標記為 *