霸位男-min

霸位男 事件:霸位中坑累街坊

相信,昨晚港鐵東鐵線大亂嘅其中一個引嚟大量花生嘅插曲,係有件 霸位男 ,報稱34歲,但個樣似43歲多啲嘅友仔,用X光片霸住兩個位,喺全車爆滿嘅情況下, 霸位男 咁玩梗係引起公憤,結果 霸位男 仲要同司機拗,有人報警叫佢落車。好彩佢落車,否則我恐怕呢條友一早被人打柒咗。

霸位男 反映果啲唔守公德嘅中坑

首先,作為一個研究IT嘅人,我會先問,點解仲要攞住啲X光片周街行,依家係連睇DICOM檔案嘅軟件都有Open Source版,Photoshop都有支援DICOM檔能力果陣,醫管局一般已經係派電子牌X光片,點解仲要攞住大大件菲林周街走。我們影相要用菲林,因為菲林有佢唔可以取代嘅地方,無論黑白定彩色,但X光片有乜一定要睇菲林,我真係諗唔通,要請教一下各位醫學界嘅專業人士。

雖然我都係一個本土派支持者,但有一樣嘢,大家必須承認,依家香港帶嚟唔少社會公德麻煩嘅,並唔只係中國嚟嘅移民,當然,中國嚟嘅移民,亦有一啲有禮貌嘅,雖然比例好低。只不過,香港有一批介乎四十歲至七十歲嘅人,呢批人有中國嚟嘅移民,亦有香港土生土長,基層、中產、有錢都有,佢地嘅問題係,為老不尊,教壞子孫,仲要以為自己食鹽多過食米乜都得,結果當然大家有目共睹。

點解依家好多香港人,包括我呢啲已經開始步入中年嘅人,對關愛座一類有保留,因為大家睇到,香港好多上一輩,係求社會尊重,甚至有特權禮遇佢地,但佢地喺社會上,又扮演緊乜嘢角色?違反公德嘅榜樣,扼殺民主嘅罪人,扼殺年青一代出路嘅罪人,呢個係好多人睇世代之爭果陣,並無睇清嘅一點,而 霸位男 事件係一件小事,但背後嘅社會問題,唔係小事。一如《萬曆十五年》講到萬曆十五年係無關痛癢,但事實上係中華帝國進入衰敗嘅轉捩點一樣。

當然,今次全車鬧爆呢位 霸位男 ,除咗因為巴士俾東鐵故障搞到好迫外,亦反映到社會嘅轉變,社會已經唔會再容忍呢啲恃老賣老,或者濫用「關愛」以謀私利嘅人,世代之爭嘅天秤好明顯,慢慢移向咗另一邊,啲當權者係懵然不知嘅。

發表迴響

你的電子郵件位址並不會被公開。 必要欄位標記為 *