王征-黎瑞剛-min

黎瑞剛同 王征 玩法係源出一轍

TVB今日入稟法院,對證監要求TVB披露Young Lion實際股東組成,作為豁免清洗(Non-GO)嘅條件嘅決定,作出司法覆核。一般情況下,做到Non-GO已經要還神,點解TVB要咁做。如果大家將 王征 當年控制亞視嘅手法,再同依家黎瑞剛控制TVB手法做比較,大家就明乜事。

王征 手法嘅上市公司版

王征 過往係點控制亞視,表面上, 王征 手上嘅亞視股份係由黃炳權持有,佢先透過佢親友盛品儒,對亞視實施控制權,但 王征 做嘢慣咗粗疏,成日用高級顧問身份指指點點,結果 王征 同盛品儒全部被DQ,之後 王征 透過借錢嘅方法,控制亞視嘅生死,因為玩得太膠,加上 王征 同台資拍檔蔡衍明反咗面,所以香港政府用收番亞視個牌嘅方法,結束呢場膠劇。

TVB係上市公司,用 王征 原裝玩法出手會出事,所以中共喺處理TVB股權問題上面係揼本好多,包括搵咗陳國強呢啲專業人士,去扮演白手套呢個角色,呢啲友仔玩慣財技,理論上喺控股結構上,會過到證監嘅要求。另一方面,TVB嘅台資拍檔係世家出身嘅王雪紅,好歹都係王永慶個女,唔似蔡衍明,充滿台灣大老粗嘅味道。再加上黎瑞剛唔係 王征 呢挺暴發戶,一直都係中共宣傳部門出身嘅官員,無錯,袁志偉呢啲仆街好核突,但中共赤化TVB本身,並唔係有咁充分證據。

只不過,呢排中國人玩財技,特別喺香港玩財技,玩到過晒火位,David Webb都列出五十隻妖股。果啲妖股好多係創仔,或主板三四線股,證監未必要吓吓維持秩序,但TVB唔係,TVB好歹曾經係恆指成份股,有唔少人係擺喺床下底長揸,亦有唔少芬佬持有,點可以俾你玩財技,中共玩財技,雖然實際目的係掩飾實際TVB嘅持有人,但證監唔會咁樣睇,如果你搞唔清楚邊啲人揸TVB股票,你班友突然喺個市場上亂咁舞又點算,仲未計會唔會搞到TVB因管理好似 王征 咁被DQ,搞到管理架構大混亂嘅問題。所以 王征 玩法又用喺TVB身上嘅西洋鏡,就係咁樣被拆穿嘅。因為 TVB係上市公司,而證監有責任維持基本市場秩序。

所以喺亞視出現過嘅膠事,難保唔會喺TVB發生。

發表迴響

你的電子郵件位址並不會被公開。 必要欄位標記為 *