日本-一帶一路-min

日本右派一早知你 一帶一路 有古惑

當習近平繼續想搞 一帶一路 大龍鳳之際,日本同印度共同突然拋出「自由走廊」概念,反拉攏南洋國家。呢個當然唔係日本反應快,而係中國一路醞釀 一帶一路 呢樣嘢果陣,日本右派一早已經知道你中國想玩乜,好早已經有日米豪(日本、美國、澳洲)聯手嘅諗法,甚至二次大戰期間,日本喺南洋戰略嘅延伸,成為 一帶一路 反擊戰略嘅基礎,但呢樣嘢,中國對此係一無所知。

日本右派嘅反 一帶一路 戰略想定

我好少寫國際政治,因為我寫國際政治,最後一定變成寫軍事戰略。喺2013年,我喺日本期間,留意到丸谷元人呢本書,叫日本之南洋戰略,當然,呢本書一如大部分右派嘅書一樣,好難睇,因為日本右派係拋唔開二次大戰嘅包袱,又講乜嘢靖國神社問題,乜乜物物,日本右派呢方面嘅執迷,作為一個戰略人,我只可以講係極度愚蠢,佢地學咗德國人嘅一半,中國依家根本無從入手,一啲道德高地都無。

但無論如何,呢本書提出一個二次大戰至今嘅戰略想定,係好重要,南太平洋係日本嘅後花園,生命線,而中國喺南洋搵食呢樣嘢,呢本書嘅情報資料十分之清晰,丸谷元人基於佢戰史研究嘅背景,認為日本既然喺南洋,擔當一個解放者角色,喺南洋受到公認,就利用呢方面嘅資產,重建保衛日本第一島鏈,第一島鏈就係沖繩、台灣、菲律賓、馬來西亞同新加坡,同埋確保日本、美國、澳洲嘅反華同盟。

呢個戰略想定,其實好大程度上,反映咗今日日本嘅睇法,由於中國嘅戰略觀,喺二次大戰後係無進步過(台灣反而進步好大,將日本陸軍士官學校同德國陸軍參謀本部嘅精髓都集齊),所以日本可以用番二次大戰嘅南洋戰略觀,去回應中國嘅 一帶一路 ,同印度結盟尤其係,除咗因為印度同中國一向關係差外,印度一向有感激日本喺印度獨立嘅支持,印度國會懸掛三位印度獨立功臣,除咗甘地、尼赫魯,就係同日本合作嘅印度國民軍(Indian National Army)創建人Subhash Chandra Bose(劍橋校友,可以娶奧地利人做老婆,喺台北死亡,葬喺日本嘅一位奇人),日本同印度嘅聯盟關係,好大程度上溯自Bose嘅關係。

所以歐洲人睇穿 一帶一路 係殖民戰略,唔奇,中國用埋啲咁out嘅國際戰略藍圖,仲要只能做不能講都講埋出嚟,梁振英仲話自己熟 一帶一路 ,我自己暗暗地笑。

發表迴響

你的電子郵件位址並不會被公開。 必要欄位標記為 *