謝偉俊-UGL-min

謝偉俊 咪喺UGL事件上側側膊唔多覺

周浩鼎要求改變UGL事件調查委員會工作範圍嘅文件,被踢爆有特首干預後, 謝偉俊 作為委員會主席嘅態度變得好關鍵, 謝偉俊 以事件性質同埋法律顧問意見為理由,有關調查委員會工作範圍嘅會議,維持係閉門聆訊。

謝偉俊 應該知道公眾期望

本來呢啲涉及程序問題嘅會議,為免受妨擾,都係設定係閉門聆訊,一如法庭好多涉及程序上嘅聆訊,都唔會公開一樣。但呢個有一個前提,就係閉門聆訊本身係公義,以及閉門聆訊並唔會損害公眾知情權。如果調查委員會成員生生性性,唔洩漏委員會調查內容,甚至請受查對象干預,咁閉門聆訊安排係正常安排嚟,無乜嘢好講。

但依家梁振英自己郁手喎,周浩鼎可以視為梁振英嘅代表都得,如果周浩鼎唔係調查委員會副主席,而係梁振英喺會上嘅發言代表,一如辯方律師,還好,問題係,周浩鼎個位suppose係法官,公眾唔相信有被告內鬼情況下開會係公義,除非周浩鼎先生喺日後任何會議都被請出委員會外,並且不享有任何發言權,咁仲好少少嘅。依家咁搞,公眾點信你 謝偉俊 可以公正行事,而唔受一直包庇梁振英懷疑貪腐行為嘅中聯辦所影響呀,大帝。

所以 謝偉俊 咪喺UGL事件上想側側膊唔多覺,如果 謝偉俊 想維持閉門聆訊嘅安排,無話唔得,但周浩鼎以及佢同一政黨嘅成員,就唔該請出委員會會議,因為大家有合理懷疑,呢班友係依據被告,亦即梁振英嘅利益行事,而唔係維持司法公正,呢樣係唔得嘅。一係,就公開聆訊,周浩鼎自己喺全世界面前三口六面講清楚,點解佢身為律師,可以膠到由梁振英幫佢改晒啲文件佢,究竟佢係調查委員會成員,定係梁振英嘅代表律師,唔該佢自己公開搞清楚自己嘅角色。

當然,民建聯一向都有濫用自己權力,以為呢個世界無利益衝突呢回事嘅情況,喺以往嚟講,叫最見到世面,形象最摩登,最無果陣土共味嘅程介南,就係衰將立法會嘅文件,攞嚟喺佢間公關公司度用,變咗公職人員行為失當,結果要坐監兼且喺政壇消失。我睇嚟周浩鼎讀咁多法律,都係無記取過程介南嘅教訓,真係無眼睇之至。

發表迴響

你的電子郵件位址並不會被公開。 必要欄位標記為 *