周浩鼎-UGL案-min

UGL案 梁振英明顯赤膊上陣

周浩鼎嘅失誤,令 UGL案 自我引爆,真係奸有奸輸。只不過, UGL案 對梁振英有幾重要,一直都唔係好夠啲證明。直至周浩鼎嘅文件裡面果啲追蹤紀錄,大家至知道,原來喺 UGL案 裡面,梁振英係赤膊上陣,呢個亦解釋咗,點解廉政公署李寶蘭會被炒。

梁振英唔避嫌編輯 UGL案 相關文件

成個 UGL案 梁振英赤膊上陣嘅證據,係政府啲電腦,特別每部Word都有佢自己嘅ID,好似file creator係用CEO_SA,即係特首辦特別助理,土共長期栽培嘅邱萍菲(由福建移民香港,成績好叻,但缺乏政治良心),而file主要editor係用CEO_CE,除咗係梁振英,好難有第二個解釋,除非梁振英俾埋邱萍菲用埋佢部電腦深夜改嘢,但斷估呢個機會唔大,照計應該係龍蝦改嘅,係定唔係嘅話都十分之花生。所以, UGL案 梁振英係赤膊上陣,唔理件事有幾難睇都搏到盡,都十分之恐怖。

由於周浩鼎係梁粉嚟,加上 UGL案 涉及係梁振英會唔會坐監,而周浩鼎同梁振英合謀改文件,周浩鼎受過法律訓練,都知道有可能干犯公職人員行為失當嘅普通法罪行,所以,我唔信係周浩鼎將佢自己頭獻俾林鄭月娥,或者周浩鼎自己都睇唔過眼,用啲咁膠嘅方法引爆,我只能講,呢鋪周浩鼎同梁振英都係平日上得山多,以為座山真係無老虎,點知一個唔小心成條路都係佢地兩條友啲腳印,結果成座山啲老虎都出晒嚟,呢鋪梁振英干預立法會運作,都唔駛乜嘢獨立調查委員會調查,因為係立法會秘書處篤爆,係吟詩都吟唔甩,如果喺西方國家,一早係水門級醜聞,梁振英要寫辭職信走去北京避難,唔被人刑事調查同扣留算佢好彩。係香港依家制度畸形,梁振英至可以仲坐喺度。

但由梁振英赤膊上陣可以見到, UGL案 裡面,梁振英係堅係心有屎,佢係喺 UGL成單收購DTZ嘅deal裡面做咗嘢,至要搞到咁緊張,如果梁振英係無做嘢嘅,又駛鬼緊張到要親自修改周浩鼎交俾立法會嘅文件,仲要佢人喺北京,都要睇住周浩鼎嘅文件,佢又唔係立法會議員,周浩鼎又唔係未受過法律訓練。睇嚟,廉署喺7月1日之後都要做嘢。

發表迴響

你的電子郵件位址並不會被公開。 必要欄位標記為 *