梁振英

梁振英 你應該知道乜叫老妨?

梁振英 威到指揮本身具律師資格嘅周浩鼎點set UgL案委員會調查範圍,不單令民建聯無威信,以及 梁振英 喺單案嘅死穴曝晒光,更可能令周浩鼎甚至佢本人干犯普通法下公職人員行為失當,甚至係妨礙司法公正,似乎呢單嘢嘅大鑊程度,已經去到 梁振英 落台後都要必須捉佢返監獄服刑嘅局面。

梁振英 點解要落鑊告劉夢熊?

相信 梁振英 對乜嘢叫公職人員行為失當同埋妨礙司法公正呢兩樣嘢十分之熟悉,因為前者佢用嚟落鑊煮曾蔭權爵士,後者佢用嚟煮劉夢熊。無錯, 梁振英 有權對立法會嘅指控作出答辯,但僅限於喺公開對質嘅情況,佢喺公眾以及立法會調查委員會席前作出申述同圖應,唔係自己搵調查委員會成員,喺調查範圍嘅定立上意圖作出對自己有利嘅決定,如果 梁振英 咁都得嘅,劉夢熊嘅信,又何來妨礙司法公正之有? 梁振英 呢吓玩雙重標準都玩得有點兒那個。

依家 梁振英 唔可以用答辯權作為擋箭牌,依家佢妨礙立法會調查委員會運作嘅事證都好清楚,依家要研究都係 梁振英 果啲註腳對案情嘅幫助,因為果啲註腳,應該反映咗果啲佢唔想公眾知,甚至有可能令佢被檢控果啲懷疑違法動作。另一方面, 梁振英 有可能干犯《立法會(權力及特權)條例》第19條b款裡面以下條款:

(b)襲擊、干預、騷擾、抗拒或妨礙任何正在執行職責的立法會人員;

其實行政長官喺《立法會(權力及特權)條例》下,言論享有立法會議員同等特權, 梁振英 應該爭取任內早日作供,而唔係作出呢啲干擾動作,依家呢啲干擾動作,不單有可能係犯法,而且 梁振英 一落任,佢喺委員會嘅所有言論唔會得到法律特權保護,係咪死多兩錢重?雖然《立法會(權力及特權)條例》下嘅檢控,都要立法會批准,而且律政司司長同意,但依家周浩鼎犯嘅錯實在太低級,無人知民建聯會唔會為咗自保,係咁玩切割,更加唔知新特首,會唔會為咗撇除梁振英呢個太上皇,叫律政司司長去檢控佢,袁國強肯定唔做律政司司長嘅情況下,如果新司長唔係梁粉,或者新司長係湯家驊,呢鋪仲唔捉 梁振英 落鑊煮?

呢次好戲連場,留名食花生。

發表迴響

你的電子郵件位址並不會被公開。 必要欄位標記為 *