湯家驊

湯家驊 恨入政府恨到發晒燒

湯家驊 近排喺中聯辦指點下,頻頻上電台派膠,依家又話林鄭月娥如果委派泛民嘅人入閣,有助修補撕裂。我喺京都聽完真係笑咗, 湯家驊 想入林鄭月娥政府都好,都唔該可唔可以做到優雅少少,至少符合一個頂級資深大律師果種優雅,食相好睇番少少咁。

湯家驊 咪講到泛民入政府好偉大

首先,泛民由選票立場,根本唔應該入政府,因為入咗政府,就要為政府孭嘅鑊負責,呢個係基本嘅政治倫理。張炳良、馮煒光做到咁仆街,都無太大影響民主黨,因為呢兩條未入政府之前,已經同民主黨,甚至成個民主運動切割,所以民主黨仍然視為反對派,泛民含淚投票都好,但至少係一個lesser evil嘅選擇,而呢個lesser evil選擇,係重要嘅。如果泛民聽到 湯家驊 老點就死得,當然,泛民嘅政客都應該明呢個道理,唔會咁容易中伏中到應嘅。所以我相信,羅致光最終會係迅速退黨後加入政府,要硬食政府施政白痴嘅責任,繼續由土共擔當好。咁 湯家驊 係家又點解,要強調泛民入政府係好事?

我個人相信,依家 湯家驊 係好恨入政府,特別唔知點解,佢好緊張律政司司長個位,好可能喺袁國強決定唔再做律政司司長後,人選仍然懸而未決,特別搵啲唔夠料喺司法覆核同刑事嘅大狀,係好容易出事,所以佢再向北京講,佢係各方可以接受,而且真係熟書嘅律政司司長人選。講真嘅,如果 湯家驊 做律政司司長,佢出手檢控果陣真係咪話唔得人驚,畢竟 湯家驊 係刑事大狀出身,係紙盒藏屍案嘅陰影下至唔做刑事大狀,但唔代表佢搞唔掂刑事嘢。

但我相信,北京唔會俾 湯家驊 做律政司司長,律政司司長係專政工具嚟,梁愛詩長年幫土共打官司,深得中共信任,所以梁愛詩只係做離婚案件,都係要佢做律政司司長,對中共嚟講,信得過遠比能力嚟得重要,呢樣係無中共黨史根柢,又只係讀番書嘅 湯家驊 唔明白。如果中共係唯才是用,而唔係唯信是用,相信中共一早係史上最強相當長嘅時間,好多獨裁政權本身,其實都係奸有奸輸,因為自己嘅多疑同奸詐,至搞到依家無人可用嘅局面,用嚟用去都係啲人渣同仆街。

發表迴響

你的電子郵件位址並不會被公開。 必要欄位標記為 *