陰謀論-min

星期日休息:未到2025年,香港已經變 陰謀論 世界

呢十幾年嚟,我哋學得最多係 陰謀論 ,而我哋失去最多嘅係信任。呢一句係電影《十年》其中一句經典對白,但依家最不幸係,好可能未到2025年,香港已經變咗一個充斥 陰謀論 嘅城市。而問題係,點解呢個城市,依家搞到 陰謀論 滿天飛。

陰謀論 滿天飛嘅政治背景

陰謀論 要發酵,一定要有一個可以培養到 陰謀論 嘅政治環境,而透明度低、以及政策任意程度越高, 陰謀論 就越嚟越有市場。你見過英國管治香港期間,至少在上世紀八十年代至1997年,警隊邊有嚟咁多 陰謀論 ,縱使大部分高層警員,是殖民地政府一手訓練出嚟,照理佢地應該係見識過定康之治。但依家嘅制度,唔係彭定康果套制度,制度往往可以決定人嘅行為,否則就唔會有制度經濟學。

依家 陰謀論 發展就特別快﹐因為董建華做特首果陣,公務員系統仲掌握喺陳方安生手上,政府公務員做嘢仲叫講規矩,所以大致上保留英國管治年代嘅一啲做法,至少彭定康留低嘅做法,並未有廢晒,留番相當部分喺度。曾蔭權年代,其實佢想個社會更開放,否則唔會搞監警會,同埋意圖將香港電台公共廣播化,不過有中聯辦班友阻頭阻勢,本來真係守得住叫唔錯,唔好話要做啲外科手術式嘅改革。而梁振英年代,公務員開始出現系統性腐敗,而梁粉接掌各大法定組織,搞到變梁粉俱樂部,法定組織發揮唔到獨立監察政府嘅功能果陣,加上梁振英要執行啲根本係有問題嘅規矩,香港公務員系統腐敗跟住嚟嘅,就係 陰謀論 滿天飛,特別係對政府部門嘅高度唔信任,就更加明顯不過嘞。

而 陰謀論 漫天飛舞仲有一個要素都好重,就係任何同中國共產黨專政工具,或者中國人利益有關嘅事,呢個政府就唔會老實向公眾交代,亦唔會公正行事。好似捐血都捐出 陰謀論 出嚟,因為呢個涉及大批中國病人喺香港搞medical tourism,同東江水問題一樣,都係牽涉到中國人嘅利益。而秀茂坪警署單嘢會飛出大量 陰謀論 ,人人變晒金田七,因為政府處理警察相關嘅問題,近年越嚟越唔公正,由暗角七警到朱經緯案都有咁嘅情況,所以市民聽到姦劫案個死因咁古怪,就好自然推想到單嘢涉及係包庇自己人,李旺陽一類嘅 陰謀論 。《十年》裡面話,2015-2025年之間,香港人學到最多係 陰謀論 ,其實2017年5月,香港人已經一次過學鬼晒啲 陰謀論 ,十日都已經夠,唔駛十年。

陰謀論 滿天飛,其實咁落去係管治唔到,一係啲有錢人,會考慮移民或者行駛一早喺手上嘅外國居留權,一係啲普通市民,小小事都懷疑政府到爆,一旦懷疑程度爆燈果陣,就變成大型騷亂,因為市民對政府一啲信任都無果陣,根本係野心家煽惑群眾嘅溫床,一如1966年-67年期間,英國政府搞唔掂啲民生問題,再加上喺澳門一二三事件裡面,共產黨心都雄晒,以為英國佬好易搞掂,卒之變成咗後嚟嘅六七暴動。六七暴動嘅出現,其實就係果種對政府唔信任嘅社會氣氛,當然,英國人比依家班中國人醒好多,英國人好快意識到 Heart and Mind嘅重要性,加上共產黨用武用到過晒火位,英國人扳回一城,攞到民心,但中國人,好明顯唔係呢種情況。

陰謀論 世界肯定唔係乜嘢好訊號,好似幕末維新之前,社會都係充斥住膠事,政府同群眾關係唔好,一隻黑船嚟到東京灣,嚇到全日本啲官員腳軟,日本被迫開國。香港咁嘅情況,一旦有大鑊嘢,都應該會亂到一個花生嘅程度。

發表迴響

你的電子郵件位址並不會被公開。 必要欄位標記為 *