LAN線-min-8

LAN線 吊頸案個疑犯原來係異形嚟

LAN線 密室殺人事件,消息人士又提供新內容,話疑犯係將手伸出鐵欄2呎,然後扯走條 LAN 線,跟住再吊頸自殺。果位消息人士,近排睇完異形:聖約返嚟,乜咁有想像力嘅。不如咁,既然消息人士已經編到成件事爛晒,不如我都幫果位消息人士,嚟個狗尾續貂,將件事寫到有咁科幻得咁科幻算,費時嘥大家時間,留番啲時間睇異形算。

LAN線 係假,原來係異形襲港

件事可能係咁,中國太空船天宮乜號喺外星收咗隻怪物,然後中國太空人收養咗佢,跟住太空人嚟香港大匯演果陣,隻異形走甩咗,然後上咗疑犯嘅身,疑犯變咗異形,跟住隻異形會四圍搶嘢同非禮,甚至強姦地球上嘅女人,為咗實現異形入侵外星人嘅大計。然後警方用咗九牛二虎之力,出動埋駐港解放軍,將隻異形活捉咗,點知隻異形喺最信得過嘅秀茂坪警署反抗,警方人員見異形反抗,為防異形食晒佢地當晚餐,就一槍殺咗隻異形,但由於唔可以講話係死果隻係異形,所以就話喺啲outdate官員眼中好鬼高科技嘅 LAN線 以人類嘅身份自行了斷,其實俾法醫驗果條屍都係假,依家條真屍以極速九秒九送咗去羅茲威爾進行比照研究,或者送咗去中南海極密實驗室,如果有朝一日中國出現異形兵團,應該係同呢件事有關,而稍後有關警員,都會成為中國國家異形研究計劃嘅成員。

我頭先寫果段古仔果陣,都覺得橋段膠到無譜,真係睇異形睇上腦,都寫唔出疑犯伸手出鐵欄外偷 LAN線 無人覺嘅橋段,如果係異形襲港,係都話疑犯伸手想搶警槍,警員自衛之下一槍打死個疑犯,都仲有少少道理,伸手出鐵欄2呎扯甩電腦嘅 LAN線 再自盡,已經係荒謬到頂點,甚至比大時代丁蟹喺男廁想用水箱嘅抽廁抽繩去吊頸自盡,點知變咗沖廁果節更離奇,更硬膠,我相信大部分市民,已經再忍唔住啲消息人士日日喺度派膠,仲要啲情節,仲衰過TVB或者台灣鄉土劇,甚至中國抗日果啲黐線劇嘅情節,我相信明年爛片獎,應該俾個獎俾呢個消息人士,消息人士為全世界編劇寫爛劇本定落一個匪夷所思嘅標準,係黐線嘅標準。

發表迴響

你的電子郵件位址並不會被公開。 必要欄位標記為 *