LAN線-謀殺案-min-2

口供房 LAN線 都偷到?秀茂坪警署膠夠未

LAN線 自殺案呢單嘢越嚟越荒謬,依家最新版本係,死者喺口供房扯斷條 LAN線 ,然後收埋咗入臭格用嚟自殺。作為一個網絡人,我想講, LAN線 吊頸都已經好唔容易,UTP Cat 5有幾硬至得,任何裝過吓有線LAN都明,你依家同我講,要由口供房嘅電腦扯斷 LAN線 ,收埋到再去自殺,成件事根本唔合邏輯。

LAN線 好難偷

之前有讀者推斷,係偷IP Cam嘅 LAN線 ,果個仲易少少,雖然 IP Cam 無畫面,理論上會引起保安中心嘅注意,而口供房嘅電腦,理論上,個犯連個mon都未必掂到,更何況要扯甩條 LAN線 ,先甩電腦,再甩個Ethernet Switch/Router之類,仲要收埋到條線,而且口供房好大機會有閉路電視監視。所以成件事邏輯上根本講唔通,甚至係黐線嚟形容,當最初有人話USB線,已經好多人唔信,用 LAN線 ,已經係磁能線級,依家係口供房條 LAN線 ,我想講,你秀茂坪警署班黑警柒夠未,你們仲想講幾多更黐線嘅版本愚弄公眾至得。

相反,依家係有一定理據,相信秀茂坪警署班友可能打犯出事,結果係咁編一啲大話出嚟。大家仲記得學民思潮林淳軒,連佢都無理被老屈係參與魚蛋革命果次暴動,搞到全民圍剿秀茂坪警署之後,警方最後唔告林淳軒,因為呢件事已經驚動到中大崇基學院方面,變成一單極膠案件。依家相信,秀茂坪班警察,可能急於要破案,有可能點錯相,或者有人一時熱血上頭,想打犯點知打到出咗事,最後搞出一單唔知點收科嘅大頭佛。上次林淳軒單案,秀茂坪警署班友仲可以drop咗單case平息民憤,最多係警隊高層面懵懵,但依家係死咗人,兼且死咗人嘅原因越嚟越有the truth is out there嘅味道,警方唔係想講,係外星人殺咗佢(即係皇天擊殺),或者有人估咗Dr. Strange,用啲奇異咒語隊冚咗條友。

警方再搵消息人士亂咁放料落去,我覺得遲早全民會勁火滾,跟住會走上警察總部交出個疑凶出嚟。風化案啲疑犯,唔係俾你班差佬用嚟未審先行刑用,咁鍾意做判官,唔該讀好啲英文做咗大狀先。

發表迴響

你的電子郵件位址並不會被公開。 必要欄位標記為 *