LAN線-min

LAN線 殺人?不如話香港警察用死亡筆記執法

姦劫案疑犯離奇自殺案,案情越聽越唔妥,之前話用USB線自殺,依家我聽到係 LAN線 殺人?臭格USB線自殺已經天方夜譚,因為疑犯係姦劫案重犯,一定會搜身搜得好乾淨,而警方亦有合法權力做詳細搜身。如果 LAN線 殺人,咁不如話俾我聽,死亡筆記已經出現喺香港,有人寫完死亡筆記,再用Wi-Fi發功嚟殺人,呢啲咁荒謬嘅情節,簡直聞所未聞。

LAN線 唔可能存在喺臭格

先講USB線,本來臭格無橫樑,仲要USB充電線,一般講緊1.2左右,吊頸無乜可能,勒死仲有啲可能,我指係被人勒死,如果係被人勒死,咁更加係金田一級嘅大醜聞。 LAN線 呢個版本仲黐線,無錯, LAN線 可以好長,但無人會隨街帶 LAN線 出街,你估少林足球隨街帶士巴拿出賽咩, LAN線 一定係警局內部,咁問題嚟,臭格係無問題,邊度嚟一條夠長嘅 LAN線 去吊死個犯?呢單嘢已經變咗典型日本偵探小說密室殺人嘅情節,有好多唔合邏輯嘅情節,即係有人好可能講大話,所以盧偉聰至話要由另一個警區調人調查呢單案,因為疑犯死因匪夷所思。

所以依家有人懷疑警方有人喺落口供期間打犯,迫打成招,點知個犯死咗,然後出事,跟住編個古仔出嚟,呢個已經變咗其中一個可能性,姦劫案被告係CCTV認人下被捕,亂咁屈人去拉人機會唔大,但依家係個犯喺未提堂,仲喺被捕後四十八小時內而死亡,而死亡原因遮近匪夷所思,如果有人有秀茂坪警署臭格嘅照片,就更容易可以睇得出,究竟疑犯係堅自殺,定吊頸自殺完全無可能,有可能變成一單誤殺案、謀殺案或濫用酷刑案件。呢件事,可能比姦劫案本身更值得關注。

喺個疑犯生前未接受任何審訊嘅情況下,我只能接受疑犯係清白,大家對姦劫案點憤慨一件事,但個犯咁樣不明不白死咗,亦都唔係香港人可以接受,呢個世界係無死亡筆記,就算有死亡筆記,都唔應該濫用死亡筆記濫用私刑,否則呢個世界將會好恐怖,更加講唔上乜嘢司法公正。依家要睇警方另一個警區,係派乜人調查呢單案,同埋可以提供幾多資料俾死因庭同公眾澄清真相,係唔係有人不合法被殺。

發表迴響

你的電子郵件位址並不會被公開。 必要欄位標記為 *