香港各界慶典委員會-稅務-min

稅局憑乜評定 香港各界慶典委員會 係慈善組織?

香港各界慶典委員會 居然可以七一打尖book維園,呢件事匪夷所思,因為民陣一早同警方報咗《公安條例》嘅通知。康文署喺深宵回覆,話 香港各界慶典委員會 係慈善組織,所以可以打尖。乜話, 香港各界慶典委員會 係慈善組織?跟住我查稅局網頁,確係慈善組織。但 香港各界慶典委員會,居然可以批為慈善組織,成件事極之有問題。

政治組織乜可以當慈善組織?

根據法律改革委員會引用Hubert Picarda對慈善組織不得涉及政治嘅睇法果陣,係咁講

……推動任何政黨的利益;倡議或反對更改本國的法律、政策或行政做法;謀求改變別國的法律;謀求推翻外國政府的政策或外國政府主管當局的某些裁定;促 進和平、國際了解或不同羣組之間的友誼(為推動國內種族和諧者除外);消弭戰爭或停止某場戰爭;力求或試圖左右公眾對具爭議性的社會問題的看法。

大家再比照 香港各界慶典委員會 嘅成立宗旨

香港各界慶典委員會(慶委會)為非牟利組織,於2006年10月成立。成立目的旨在組織香港各界人士,籌辦各項慶祝節日的典禮活動,促進社會各界積極參與,弘揚及提高國家民族意識,建立和諧社會。

弘揚及提高國家民族意識,本身就係政治,換言之, 香港各界慶典委員會 ,根本唔應該享有《稅務條例》第88條嘅豁免,所以我依家明白,點解班商界佬,個個撲出嚟搞呢啲擦鞋活動,原來擦靚北京對鞋可以免稅,共產黨同中聯辦咁吸錢都得,仲要擺明違反香港法律,乜香港有呢啲咁著數嘅嘢,無人同我講過嘅。依家康文署一個鬼拍後尾枕,至篤爆原來擦北京鞋有慈善免稅優惠,呢種做法人渣到爆,簡直係搾乾其他慈善組織嘅捐款。

記者如果有心,係應該追政府,點解2007年果陣,稅局竟然可以批 香港各界慶典委員會 有慈善組織嘅優惠,理由係乜先,我睇唔到一個擺明車馬嘅政治組織,有乜理由可以獲得慈善組織嘅地位,如果政府唔同公眾解釋清楚,公眾條氣係好難頂,原來擦共產黨鞋可以交少啲稅,呢啲公平咩,共產黨可以濫用香港法律到呢個程度,簡直係令人髮指。

發表迴響

你的電子郵件位址並不會被公開。 必要欄位標記為 *