羅致光-min

羅致光 入閣已成定局

雖然林鄭月娥內閣,依家只得特首辦主任陳國基係確定,只不過,另一位林鄭月娥內閣成員,應該好快會confirm人選,呢位成員,就係民主黨嘅大腦,IQ超高嘅 羅致光 ,依家係未知 羅致光 做勞工及福利局局長,定係房屋及運輸局局長。因為房屋及運輸局局長,依家揸莊果個張炳良,都係前民主黨高層嚟。

羅致光 要入政府嘅步驟

羅致光 入政府,當然其中一大障礙係退出民主黨,呢個未必好大問題,因為好多乳鴿都想佢走,而 羅致光 呢幾年同政府行得太近, 羅致光 淡出黨務,其實都係某程度上走張炳良模式。但仲有兩個障礙係,因為 羅致光 曾經喺北美留過好一段時間,所以佢做得局長,一定要清理乾淨佢同北美嘅法定聯繫,而以我所知,已經清得七七八八。剩番,當然係品格審查,但呢關唔會難到 羅致光 ,畢竟依家所謂嘅品格審查,難聽啲講,用嚟防君子就得,用嚟防小人就唔多得,否則呢個政府唔會係咁爆完又爆。所以黃永仲有可能出閘脫腳(佢最後入唔入政府,睇佢走唔走數),但 羅致光 入政府,好可能係爭北京開綠燈,但北京都可能會開綠燈。張炳良都開得, 羅致光 又算得乜,陸恭蕙反而係因為有洋人另一半所以至有麻煩(陸恭蕙嘅另一半係Sunday以前個老闆何力勤),啲人分析果陣,全部計漏嘢。

只不過 羅致光 入咗政府,好可能會變大奸大惡之人,大家睇張炳良就明,張炳良雖然喺英治年代,一早就知佢有問題,條友喺關鍵嘅政改投票走去投棄權票,不知所謂,但真係顯露佢本性,其實係做咗局長之後,佢做咗房屋及運輸局局長後,喺好多問題上嘅發言,佢邊似係一個人呢?而 羅致光 係以IQ高,同埋佢好熟民主派內部運作出名,一個咁嘅人入政府,對民主運動未必係好事。陸恭蕙入政府之後,大家會覺得佢仲係英治年代直選果陣,同李柱銘會師春秧街果個陸恭蕙?所以我都怕, 羅致光 入咗政府之後,會唔會變咗一個出賣良心甚至民主運動嘅仆街。

年少無知並唔係一首應該喺年青人學運唱嘅歌,你見張炳良、陸恭蕙、馮煒光等人嘅變質,再去聽呢首歌果陣,你就明《天與地》同《千言萬語》係寫乜。

發表迴響

你的電子郵件位址並不會被公開。 必要欄位標記為 *