hidden Agenda-梁振英-min

梁振英應該會加倍力量殲滅 hidden agenda

梁振英心理唔平衡,呢個相信唔係乜嘢新聞,只不過, hidden agenda 冚檔事件,將會令大家更加比較到,有政務官背景嘅林鄭月娥,有時仲會知所進退,但梁振英呢啲心理變態,我都可以幾肯定,梁振英會要求地政總署同警方加快做嘢,以滿足佢落任前嘅變態心理。

梁振英同林鄭月娥對 hidden agenda 態度唔同

雖然由利益層面推算,要 hidden agenda 死嘅,好大機會係林鄭月娥,但只不過,林鄭月娥會見民主黨果陣,都話除咗消防,其他嘢都可以傾,佢知道 hidden agenda 消滅咗,未必對佢發財大計有利,因為依家國際社會媽爆,更加可能影響起動九龍東嘅物業形象同價值,所以話消防以外,乜都可以傾,其實林鄭月娥提供放水位,某程度上, hidden agenda 叫得band界紅館,係有可能帶旺活化工廈計劃,其他地產商有可能同 hidden agenda 傾到個deal出嚟,某程度上,林鄭月娥計係利益,唔係面子,所以佢係有一定嘅商量空間,甚至有機會斟到共贏。一如林鄭月娥為咗羅致光可以入嚟,快快趣見民主黨一樣,林鄭月娥有佢為咗利益而靈活嘅一面,呢個好係佢嘅性格。所以 hidden agenda 堅持到,唔係無機會生存落去,只不過有可能要同地產商「合作」。

梁振英唔係,梁振英係一個與人鬥,與天鬥其樂無窮嘅毛澤東式心理變態,你唔能夠要求一個變態佬會make deal,由DQ事件,佢平日講嘢方式,果種好勝同好鬥,你就知道梁振英眼中, hidden agenda 同佢鬥就要慘死,所以隨時律政司、地政總署要加快做嘢,唔會俾任何林鄭月娥可以用嘅談判空間。所以如果公務員唔想做磨心,好多嘢,公務員唔應該hea,但 hidden agenda 呢件事,不妨hea夠七月為止,因為呢段時間,我相信林鄭月娥同 hidden agenda 可以傾到一個協議,當然可能會拉一個地產商落水,但地產商幫政府救火就會有著數,就會有數可以圍。但如果hea唔到,林鄭月娥咁又因此多咗個仇家。

發表迴響

你的電子郵件位址並不會被公開。 必要欄位標記為 *