寶麗來-polaroid-min

寶麗來 仍然係比Instax優勝

雖然依家好多人鍾意玩富士嘅Instax,但我個人嚟講,其實對 Instax本身興趣唔大,反而,對 寶麗來 興趣大好多。雖然 寶麗來 因Dr. Edward Land喺八十年代錯到離晒譜嘅決策,令成間公司一沉不起,無法維持即影即有系統嘅營運。(富士停止專業用FP-100生產,應該似係想脫離 寶麗來 影子多啲,因為所有生產線中,得FP-100係 寶麗來 嘅規格同技術有關)。我個人睇, 寶麗來 有樣嘢,仍然係好過富士,雖然我影菲林,都唔少時候用富士菲林。

寶麗來 好過富士嘅地方

  1. 相機外形工業設計,今日Instagram個Logo,其實係嚟自 寶麗來 用SX-70相紙嘅經典機種Onestep,亦即係所謂彩虹機。 寶麗來 喺工業設計上至少似一部見得人嘅相機。你睇吓Instax,真係果陣玩具味出晒嚟,我指係果啲令人感覺十分之兒戲嘅玩具,你唔認為係一部認真嘅相機。我都未計 Instax本身相紙偏細,以及採用ISO 800感光度造成嘅粗微粒問題。所以Impossible Project有一定擁躉支持,亦係呢個理由。
  2. 寶麗來 相紙嘅尺寸係比較合理,今天Instagram嘅正方形比例,其實成件事個邏輯,就係 寶麗來 嘅相紙。Dr. Edward Land係有佢嘅特殊創見,因為佢某程度上影響埋今日social media對相片比例嘅睇法。Instax果種細張,我只能講,你當貼紙相嚟玩,fine,但如果你想要永遠留念嘅即影即有,你仍然係用 寶麗來 系統吧。
  3. 寶麗來 嘅機,雖然係塑膠做,但多數喺英國或美國裝嵌,所以結構方面係相當實淨,簡單嚟講,都叫經得起時代考驗,依家富士Instax嘅機,幾乎全部中國製造,用果啲鏡頭以至機件都係cheap到唔恨,大佬,我都唔係無要求到呢個地步嘛。無錯,我唔係要用部120機配寶麗來pack嚟影,但都唔係要用部玩具咁玩法,當然富士志在賺菲林錢,但某程度上,Impossible Project同香港MINTS計劃嘅出現,都係頂唔順富士呢種態度。

所以, 寶麗來 仍然會有一批捧場客,好正常。

發表迴響

你的電子郵件位址並不會被公開。 必要欄位標記為 *