六七暴動-五十年-min

六七暴動 五十年:工聯會公祭展現無恥

今日係 六七暴動 五十週年,如果工聯會想香港公眾接納呢個組織喺1967年從事恐怖活動嘅過去,係應該誠心道歉,並且林彬之死作出清楚交代,喺北京派出嘅民兵做,定係工聯會自己啲友仔做,工聯會同北京政府都應該有所交代。只不過,由 六七暴動 少年犯組成嘅67動力研究社(咁嘅名都改得出,你自己用香港語讀一次),竟然話林彬之死係懸案,兩姊弟被炸死案都同佢地無關,呢個係豈有此理。

六七暴動 係恐怖主義行為

六七暴動 同香港歷次暴動有一樣嘢係最唔同,就係 六七暴動 有大量恐怖主義行為出現,包括同胞勿近嘅炸彈,以及林彬血案果種揀人嚟殺嘅做法。香港人好多人唔識分恐怖主義,同埋一般暴動,甚至示威。好似2016年魚蛋革命,果種如果喺歐洲標準嚟講,特別法國標準,只不過係碎料嘅示威。喺法國,最低標準係燒警車,呢個我講過n次,但一般唔會放炸彈,更加唔會搵目標嚟殺。而 六七暴動 係terrorism,因為行事方式完全符合咗恐怖主義標準,包括高度組織化,涉及放炸彈以及以個別目標謀殺,或者製造恐慌去謀殺嘅行動。所以我喺《1967:國際視野的反思》呢本書度,我係用英國人對付馬共同IRA方式做比較,因為馬共、土共、IRA根本係用同一套手法搞嘢,咁英國政府亦應同一套手法嚟對應。香港人好多無直指工聯會根本係恐怖組織,或者英國人無直接用Prevention of terrorism act去對付工聯會,其實係有英中關係嘅考慮,避免引發戰爭,否則呢班友應該以恐怖分子之名落鑊。

喺全球一致反恐嘅年代,呢班恐怖分子頭目仲敢出嚟要求平反,除非北京自己攞文件出嚟,證明啲炸彈案、林彬案都係由北京派嚟嘅民兵做,但如果真係北京派嚟嘅民兵做,喺國際法角度上,呢個就變成中國入侵英國領土,呢件事可以引發極大嘅外交風波。我個人都希望北京交代 六七暴動 嘅真相,只不過,北京係唔會嘅,除咗檔案好可能已經不存在之外,而且呢件事北京理虧在先,唔搵你班土共做替死鬼,咁北京用咁多錢養你班土共做乜至得。

發表迴響

你的電子郵件位址並不會被公開。 必要欄位標記為 *