皇后街熟食中心-min

皇后街熟食中心 :香港hawker center有得做

食環署熟食中心呢樣嘢,正路計好少喺遊客嘅視線範圍,至少我未見過華人遊客,甚至洋人遊客,會一批批咁熟食中心出現。但喺中西區舊城區, 皇后街熟食 中心 可能係例外,有大批洋人,喺度食。我相信好少人會相信, 皇后街熟食中心 可以有一半嘅檯係洋人光顧。

皇后街熟食中心 係一個可以考慮嘅模式

皇后街熟食中心 咁多洋人,唔係因為出現一啲洋人旅遊必食嘅項目,而係因為呢間熟食中心嘅西餐係好出名,如果有啲為食嘅人,應該會聽過 ABC Kitchen 呢個名,呢個會係遲啲嘅食評裡面慢慢介紹。西餐係一個熟食中心裡面出現,喺香港係好神奇,但 皇后街熟食市場 相對乾淨,以及飲食類型唔會只係單一「大排檔式」飲食,反而係香港一眾熟食中心之中,比較接近新加坡共和國嘅小販中心(hawker centre)嘅玩法。 皇后街熟食中心 除咗有茶餐廳美食(陳財記),仲有潮洲粿粉(曾記),甚至連北方餃子(老北方餃子館),同埋印度尼泊爾薄餅都有,呢種多元兼容嘅玩法,反而令 皇后街熟食中心 指引出一套,香港保留傳統美食嘅前途。

當然,皇后街熟食中心嘅出現係比較神奇,因為政府清拆香馨里果堆潮洲食肆,有部分食肆就直情上咗鋪,好似陳勤記,剩番嚟嘅空間,政府唔知點解咁神奇用嚟試新嘢,反而令香港一個周圍都唔係點搵到,反而有新加坡風格嘅市區食堂。如果政府搞唔掂墟市唔緊要,但政府至少要保留或興建相當數目嘅熟食中心,並且交俾有心嘅人經營,甚至世代相傳,好似新加坡咁,而政府做好衛生管理,以及座位、洗碗呢啲工作,其實係可以得到一個保留美食嘅路,又適合香港嘅環境。當然食環署近年監管外判商極hea,由公廁到街市到熟食中心都係,可能要先將呢啲原本由市政局同區域市政局負責嘅部分,交俾民選區議會管理比較好,亦可以令區議會向英國/新加坡式嘅市鎮理事會(town council)模式進發。

甚至如果領匯有心將冬菇亭用新加坡式管理,都唔會成日俾左膠有位入,有時講政治嘅目的,都係想搵番啲好食嘅地方啫。

發表迴響

你的電子郵件位址並不會被公開。 必要欄位標記為 *