假日司機-炸彈-min

假日司機 : 香港炸彈

上個禮拜六有撞倒行人車禍,今日都有,清水灣道銀線灣對開,難得雙程證旅客依照燈號過馬路,就有香港膠司機唔理燈號係咁撞過去,仲要由得個傷者喺大玻璃上七百米至停車,完全係黐線。呢件事,令大家睇到 假日司機 嘅問題有幾大。

假日司機 唔識踩brake㗎

我大概介紹吓銀岬路附近清水灣道係點,其實唔複雜,雙線雙程行車大直路,至少喺過路燈前一段,係好清楚有紅綠燈,而由於銀岬路有車出入,所以正常嚟講唔應該衝紅燈,更加唔好過撞人。呢個人,應該係 假日司機 ,唔熟環境兼且自己駕駛態度有問題仲想搏大霧衝紅燈,結果依家就真係膠到無朋友。大佬,不顧自己撞到人衝到孟公屋路口至被人截停,隨時係因為孟公屋口等小巴啲居民,見到情景太過得人驚,所以立即截咗先講。因為截停果個位,係有個小巴站,一向有唔少居民等去將軍澳港鐵站嘅小巴。

香港交通太膠, 假日司機 出現係正常,問題係, 假日司機 本身已經唔係揸得熟,自己駕駛技巧唔高,唔係要揸得慢(揸得慢同揸得安全係兩回事),但最好係當自己仲係考緊牌咁揸,喺燈位前見黃燈就收油,然後停,唔係諗住仲踩多兩腳衝埋佢,因為你唔知有無行人膠出現,好似上次果啲行人膠都死得人多。只不過,依家有啲 假日司機 ,自以為好醒放假就以為放監咁,喺郊區啲道路亂咁舞,呢場車禍好大機會係咁發生。仲要依家咁嘅情況,完全唔似係撞車黨所為,因為燈號好清楚係紅色。相反,係咁由得個傷者喺大玻璃上面停都唔停,仲要沿線有巴士站做避車位都唔停,呢種仲衰過發生意外後不顧而去,真係衰啲講句,你屈個司機想將傷者遺棄喺路邊,葬埋都有人信。相信法院考慮呢單案果陣,呢部分都可以令到個司機極之大鑊。

香港已經好多膠司機,但 假日司機 呢樣嘢,就更加係膠上膠,呢個絕對係香港炸彈嚟。都係果句,香港唔係事必要揸車,但如果真係決定要揸車,唔該你確保你嘅集中力、體能等各方面係合適至好揸,因為依家香港揸車簡直係炸彈世界嚟,做行人都有風險,更加唔好講係司機。所以我喺香港唔揸車,係有我原因。

發表迴響

你的電子郵件位址並不會被公開。 必要欄位標記為 *