C919-min

C919 用晒西方國家組件咁又點?

C919 喺中國攞到適航證明首飛,只不過攞唔到 FAA 嘅適航證明,應該飛唔到西方國家。好多中國人,特別愛黨力啲五毛,打晒飛機,話 C919 點勁。講真, C919 只不過代表你中國人未學行先學走,喺航天工業上, C919 用晒西方國家組件都唔代表啲乜。

中國連烏克蘭、俄國、台灣同日本都不如

同樣係共產主義國家,俄國雖然自己都少用自己嘅民航機,但烏克蘭 Antonov 設計局始終係威嘅,世界最大嘅噴射運輸機 An-225 就係烏克蘭產品,用自己或俄國嘅引擎,連北約依家有啲任務,都係租用 An-225 ,而唔係用Airbus Military A400 ,要打飛機至少要做到烏克蘭呢個水準,先至好學人打飛機。

同台灣以及日本比,中國 C919 一樣係笑料嚟。台灣係無自己砌成隻機嘅計劃,但係波音787計劃嘅關鍵部份之一,波音747 Dreamlifter嘅改裝工程,係由台灣長榮負責,果陣長榮未因家變淪為一個中國式航空公司,長榮當時當家嘅,本身都係專業機師,你諗吓點解可以玩到改裝波音747咁喪。而波音787唔少組件,係由日本負責同供應,並且安全喺世界各地飛,我都未計依家三菱重工MRJ,如果亞洲市場真係爭,隨時MRJ仲好打過 C919 。

C919 用咁多西方國家組件,其實唔代表乜,理論上,世界大部分飛機已經係聯合國大雜燴,就算飛機引擎,真係可以將噴射引擎技術完全掌握喺自己手,都只係得英國勞斯萊斯,通用電氣就係扇葉技術唔得,至要同法國佬合作成立CFM International,通用電氣連依家GE90好多組件都係法國技術嚟。Pratt & Whitney,本來都okay,但依家都唔係要用通用電氣合作,就要同德國佬MTU合作。但點講都好,點解商用飛機市場,主要玩家都係波音同Airbus,因為呢個係一個系統整合問題,架飛機安唔安全可靠,系統整合係關鍵,點解初期A380進度慢,因為德國佬同法國佬嘅截然相反思考方式一度有整合困難。而美國因為長期係一個「砌機砌嚟嘅國家」,所以一涉及系統整合嘅嘢,美國佬超強,航空母艦同飛機都係系統整合問題多於一切。中國人連teamwork都唔識講,講乜春系統整合至得。

C919 搞到連梁振英都出blog打飛機,可以見到中國共產黨果種唔踏實同自卑。當你對航空發展有啲認識, C919 好明顯,賺唔賺到錢都成問題,搞得唔好,又係一個俾中國充大頭鬼,實際送錢俾CFM International、Honeywell、UTC呢啲集團嘅走資項目。

發表迴響

你的電子郵件位址並不會被公開。 必要欄位標記為 *