反對外國干預 與關門打仔

中共一聽到英美鬧佢地喺香港事務走數,果啲陳腔濫調就出嚟,對住民主派,就指責民主派唱衰香港,而對住英美政府,就回應話 反對外國干預 。呢啲白痴到爆嘅陳腔濫調,有啲白痴嘅香港人又竟然會受,可能士多貢(斯德哥爾摩)候群症得太耐。但呢啲陳腔濫調,只要稍明歷史,其實唔難篤爆。

反對外國干預 ?邊個主動向聯合國備案?

如果香港並唔係國際條約下建立嘅城市,咁中國話 反對外國干預 仲有少少道理,但當年鄧小平為咗取信於國際,唔單只將《英中聯合聲明》定性為國際條約,仲要喺聯合國備案。香港事務係國際條約冇否妥善履行嘅問題嚟,點解外國唔干得預,當涉及國際條約,就無內政呢回事。講 反對外國干預 呢六個字本身,都係意圖走數行為,國際社會係絕對有權出聲。

而且內政並唔代表可以為所欲為,有啲事一過咗火位就邊個國家都可以干預,好似北韓射導彈到公海,或北韓喺自己領土進行核試,中國又點解要理呢,如果根據中國政府一貫嘅 反對外國干預 論。北韓嘅作為,威脅世界和平,就要出手。一如有啲國家嘅統治過於殘暴,引起全民公憤嘅時候,都只會引發文明世界出兵一樣,主權並唔係一塊俾獨裁國家任意妄為嘅遮羞布嚟。呢個已經無計有大批西方國家嘅國民,依家住喺香港呢個國際城市。

事實上,點解二次大戰後美國咁鍾意做世界警察察?你估真係攞到著數?事實上,西方文明國家做世界警察,唔只因為果種傳教士情意結,要宣揚民主人權嘅福音,仲有係德國對猶太人嘅大屠殺,令西方有所反思,令西方明白,原來有啲暴行、有啲暴君,必須一開始出聲制止,否則日後出兵都無濟於事,無錯,納粹德國喺1945年被徹底擊敗,但幾百萬死喺集中營嘅猶太人都已經救唔番一樣。更何況中國共產黨有過長春圍城戰,以及北京坦克屠城嘅殺人紀錄,遮打革命期間英美嘅干預我個人嫌唔夠,如果西方願意大力制止梁振英亂嚟,甚至凍結梁振英喺英國嘅資產,我相信未必有咁多年青人想尋求香港人獨立,呢個喺彭定康勳爵口中並唔聰明嘅諗法。所以,叫中國外交部班友慳啲喇。

發表迴響

你的電子郵件位址並不會被公開。 必要欄位標記為 *