國歌法-田漢

立 國歌法 ? 中共你搞清楚中國國歌歷史先

據聞中共為咗防止香港人,特別港獨派同親英派惡搞國歌,要立 國歌法 。我聽完呢個建議,笑咗,立即搵咗當年紅衛兵批鬥田漢嘅照片出嚟。田漢係今日中國國歌嘅作詞人,並交俾聶耳譜寫成曲。如果中共真係咁尊重國歌嘅作詞人,點解當年紅衛兵批鬥田漢。如果要立 國歌法 ,唔該當年有份批鬥或聲討過田漢嘅人,全部出嚟跪玻璃先。依家中共仲有好多人,仍然認為文革無做錯。我懷疑唔少參與過鬥委會嘅土共,喺文革期間,都有份聲討過田漢呢位修正主義分子。熟讀中共黨史嘅人就知,依家中共掌權嘅人裡面,一大堆人都係有負田漢。

中國國歌係抗日,只不過喺東京寫成

當你好熟知《義勇軍進行曲》成個創作歷史果陣,你更加會傳出大量恥笑聲。無錯,田漢喺一個煙包上,寫上《義勇軍進行曲》嘅詞,但中國國歌嘅曲調本身,喺東京寫成,而聶耳喺藤沢市(藤沢市就係鎌倉果頭)游水果陣遇溺死亡。你有無聽過,一首抗日歌曲,點解會喺敵人嘅首都寫成咁搞嘢。點解聶耳無喇喇要去日本,唔係走去日本搞抗日工作,而中共為咗防止聶耳被國民黨政府拘捕,取道日本去蘇聯,當時中共安排啲人著草,竟然可以係取道當時嘅「敵國」再去大老闆蘇聯果度,當時中共究竟有幾抗日,大家可想而知。所以,中國國歌係抗日歌曲本身,你知史實果陣都知係笑話嚟。同《馬賽曲》比,《馬賽曲》係喺法國史特拉斯堡市長官邸創作,因為法國大革命後,奧地利帝國入侵法國意圖干預革命,堅係抵抗外來入侵。越知得多呢啲歷史,你越會想鄙視呢首歌。所以中日未建交果陣,1954年日本有人豎聶耳紀念碑,1965年,文革爆發前夕,毛澤東磨拳擦掌想落田漢鑊果陣,日本政府正式修繕聶耳紀念碑,三年後,田漢就喺中國不得善終,如果聶耳當時泉下有知,又會點睇?

所以,立 國歌法 ,你中國政府諗清楚好。呢啲歷史一挖出嚟,你有排被人恥笑,仲衰過被人惡搞國歌。

後話:最好笑係,義勇軍進行曲嘅唱片,第一個發行嘅唱片公司百代唱片,即係EMI,就係一間英資公司,當年好多親共人士都係搵百代出唱片,因為田漢老婆喺打英資公司工,連聶耳都係打英資公司工。無英國人,你唱乜鬼義勇軍進行曲,收檔吧喇。

發表迴響

你的電子郵件位址並不會被公開。 必要欄位標記為 *