辱警罪

鼠王芬恨做律政司司長恨到要立 辱警罪

大家都知,香港立法會議員嘅實權十分之有限,所以土共議員一向都懶得用私人草案嘅權力,但鼠王芬竟然唔記得咗香港立法會議員嘅私人條例草案權力已經淪為裝飾品,竟然話要提交私人條例草案,要 辱警罪 。做乜事鼠王芬,會對 辱警罪 呢樣嘢咁有決心,又未到區議會選舉。

鼠王芬借 辱警罪 草案當CV交

袁國強唔肯繼續做律政司司長,返去佢間大狀行搵真銀已成定局。而任何正常搵緊大銀嘅資深大律師,甚至事務律師,都唔會咁傻仔犧牲自己時間同搵銀機會去做律政司司長,特別呢個位喺普通法司法管轄區都臭晒朵,試問邊個想行走江湖想做。基本上,傳聞嘅律政司司長人選,包括湯家驊資深大律師在內,都唔似有可能走去做律政司司長。咁剩番會對律政司司長有興趣,應該係一啲,平日唔搵開大銀,依家繼續浮浮沉沉落去,又唔似會有前途果啲人,至會咁搏命爭住做律政司司長。

馬恩國大律師做律政司司長都無乜可能,要馬恩國放棄千辛萬苦得嚟嘅澳洲公民身份,傻的嗎。而依家土共法律界人士中,謝偉俊律師,同埋廖長江大律師,都係法律界搵到銀嘅有實力人士,佢地都唔會想做律政司司長。依家左數右數,有法律知識,熟中國法律,依家搵唔到真銀果個,就得梁美芬一個。佢繼續留喺城市大學,佢都唔會做到法學院院長,佢又出唔到去大狀界搵真銀,咁好嘞,梁美芬唔通繼續坐喺度做立法會議員,最高咪做到行政會議,葉劉淑儀做過保安局局長,叫做威過,所以葉劉淑儀留喺行會都無所謂。但梁美芬依家都未威過,更何況律政司司長嘅待遇,一定好過城大法學教授,如果做得唔錯,退任果陣可以得大紫荊勳賢,甚至係全國人大常委、全國政協常委呢啲位做,點解唔搏先。所以梁美芬忽然間喚起全民對七警嘅記憶,要自己提 辱警罪 私人條例草案,仲要律政司司長未必批准提交嘅私人議員草案,旨在向林鄭月娥同中聯辦交求職申請,話到明想做律政司司長,一做律政司司長就會就 辱警罪 立法,中聯辦同林鄭月娥應該會龍心大悅,好快就會對律政司司長人選作出決定。

梁美芬做律政司司長,香港唔大亂就奇,我真係食定花生。

發表迴響

你的電子郵件位址並不會被公開。 必要欄位標記為 *