菲臘親王

菲臘親王 退出公職,英女皇應會多坐一會

今朝早係一個謠言滿天飛嘅早上,又話 菲臘親王 死咗,跟住又話白金漢宮有重要會議。結果皇室方面有公布,就係 菲臘親王 會退任公職,但英女皇會繼續履行公務。依家睇究竟係威爾斯親王,定係威廉王子喺皇室公務上扮演更重要角色,呢個將會睇到英女皇最終嘅傳位安排。

菲臘親王 可以退休,英女皇唔得

其實依家 菲臘親王 都未正式退得休,要等到秋季至得,因為今年大選會十分之難搞,話保守黨佔壓倒性優勢,但因為呢次係BREXIT二次公投,會搞出乜政府出嚟完全無人知,英國人果種策略性投票行為,已經比法國佬更難估。雖然英國君主立憲之下,女皇唔似會有角色,但出現hung parliament嘅情況,係唯一例子,雖然係公務員俾意見佢,但最終決定仍然係女皇做,呢個亦係點解英國對皇室嘅睇法,遠超marketing用途,或者八卦新聞來源,因為佢係英國出現大危難果陣最能能揸莊嘅人,佢係英國憲政嘅emergency exit嚟,所以依家 菲臘親王 退休,好可能係英女皇退位嘅序幕。而英女皇決定邊個某程度上替代 菲臘親王 嘅角色,某程度上將會反映,英女皇將會點安排傳位,特別係唔係由威廉王子直接繼位,定係由威爾斯親王查理斯王子做一個過渡性質嘅國王,再由威廉王子繼位,定係查理斯王子係一位會坐一段時間嘅實質君主,呢啲都係令英國朝野,甚至大批海外仍然奉英國國王為國君嘅英聯邦國家所注視。

英女皇短期內係唔退得休,只不過,查理斯王子如果係會長期坐嘅話,我相信會有麻煩,因為查理斯王子係一個左膠王子,而且佢對政治有鮮明嘅睇法,你睇佢點辛辣咁諷刺班中國領導人,尤其江澤民個款,就明佢對政治嘅睇法有幾鮮明。擔任英國國王必須深深了解政治,但唔應該有自己太多睇法,否則實會出事,特別會同民意以及國會有衝突,屆時就會好麻煩。而依家,查理斯王子將會點安排,就係英國未來君主立憲前途嘅風向標。但我相信,威廉王子繼位,可能會對澳洲、加拿大、紐西蘭等國保留君主制度比較有好處,畢竟佢同戴安娜嘅婚姻真係一個致命傷。

發表迴響

你的電子郵件位址並不會被公開。 必要欄位標記為 *