香港自治領-min

香港自治領 – 香港最終出路

點解我會寫呢個blog,其實最初寫blog並唔係為廣告,而係防止啲人抄橋唔認帳。最近有某位滿天神佛嘅道士,想抄香港走向自治領嘅橋。當然,我會加快香港論嘅寫作過程,我會稍後開「香港論」嘅網站同facebook page,其實都係唔考慮賣書(我賣書都係Kindle同Apple iBook),而係真係怕啲人抄完橋可以唔認帳。你面對熱城啲爛仔,你必須有明確立場。

香港自治領 符合香港大多數人利益

自治領(Dominion),係1867年嘅英屬北美法(British North America Act 1867)發明嘅產物,最初只不過想解決加拿大、澳洲呢啲幅員廣大嘅海外英國領土嘅管治問題,呢啲白人為主嘅領地,英國政府叫班友自己搞掂佢(所以澳洲1901成立自治領果陣,澳洲人都唔知乜嘢叫澳洲,澳洲呢個國家概念係加里波利之戰,澳紐軍人奮戰到底之後至有國家精神,亦因此,澳洲同紐西蘭嘅國家精神同麻甩呢個概念有密切關係),但1921年,英國攞嚟作為愛爾蘭獨立戰爭議和條件,自治領就變咗用嚟解決英國殖民地獨立同自治問題嘅方法,之後有英聯邦王國(Commonwealth Realm)呢個概念。華夏無邦聯,但英人早就一君n國好耐世紀。

Dominion本身,可以係最終國體,好似加拿大、澳洲,亦可以係邁向共和或併入另一個國家嘅過渡,好似1957年,就任香港總督嘅新加坡總督柏立基,決定俾新加坡全面自治,1959年李光耀做首席大臣嘅新加坡,本身就係一個Dominion,外交國防歸英國管,但內部李光耀自己搞掂佢。由於香港係一個殘局,同本身嘅防務需要,香港先歸英成海外領土,再用新加坡模式,喺若干年後成立一個自治政府,類似新加坡咁嘅自治領,係一個方案嚟。當然,我個人認為,最終方案係香港變成類似加拿大、澳洲一類英聯邦王國,特別英聯邦可能變成一個共同市場情況下,香港成為英聯邦王國,然後同英、澳、紐、加四個有大批香港人居住或歸化嘅國家締結共同市場協議,呢個對香港嘅生存係大有好處。香港共和國呢樣嘢,我睇依家中國嘅混亂程度,已經庶近不可能,而香港亦難免要俾英國Trident海基核武部署(英國解密文件指,曾考慮部署核武喺香港,係有理由嘅),否則會有麻煩,既然如此,何不擁戴英女皇及其後代,作為香港人嘅君主,再行西敏體制。

香港自治領,係我認為最終出路,但可以肯定係,所以華夏聯邦係唔會存在,最可能反而係一個漢字系國家共同市場,包括日本、易名後嘅台灣、新加坡、香港。如果馬來西亞政局穩定,以及大韓民國復用漢字,可以加入呢兩個國家。但華夏聯邦呢啲春秋大夢,少發好,中國基本上已經無得救,亦唔可能救,聯合國托管一百年都唔知救唔救得番。你睇土耳其凱末爾呢啲歐化土耳其人改革,依家一次公投就搞到打回原形,新憲嘅總統制有如恢復哈里發制,你就明,香港接受過英國超過一百幾年統治係幸運,新加坡人立萊佛士像紀念佢係有理由。

發表迴響

你的電子郵件位址並不會被公開。 必要欄位標記為 *