特朗普見 金正恩 :中國立即揮軍南侵?

北韓局勢喺特朗普嘅不按牌理出牌玩法之下,真係好鬼多變。特朗普突然向 金正恩 提出,只要條件合適,佢願意見 金正恩 。呢個一百八十度玩法,又係乜嘢玩法嚟。

金正恩 只不過係個無飯開嘅古惑仔

我一向都用分析黑社會嘅方法,去分析南北韓局勢。 金正恩 係咁射導彈,其實同啲想收保護費,又無飯開嘅古惑仔無分別,啲商鋪唔肯俾保護費,咪日日破壞你鋪頭門口啲嘢去嚇你,但如果要真係冚友, 金正恩 係連開山刀都買唔起,佢手上,只係得一把生銹嘅生果刀,呢個就係 金正恩 嘅現況。如果美國願意保證 金正恩 嘅罪行唔會被清算, 金正恩 喺海外嘅財富以及榮華富貴可以保持, 金正恩 隨時會將北韓雙手奉上。其實 金正恩 依家邊度都去唔到,同坐監無分別,佢日日喺平壤玩啲變態玩意,又犬決、又炮決,無錯,睇落好威咁,但個國家破落成咁,有幾多個人會為呢啲虛榮會死撐落去,實在值得懷疑。中國一直都怕, 金正恩 會向美國投懷送抱,並唔係無的放矢,因為 金正恩 隨時會雙手奉送自己個國家。而依家中國要執行聯合國制裁,騎虎難下,如果特朗普真係秘密安排會見 金正恩 ,例如喺日本,甚至台灣會面,屆時你中國真係屎都得食,中國東北突然間同美國嘅盟國接壤,無咗北韓呢個戰略緩衝地帶,你係習近平嘅話,頭唔痕就奇喇。

所以依家實際上,係將個波又拋番俾中國,如果中國仍然控制唔到 金正恩 ,美國收咗 金正恩 做𡃁,中國唔好怨。所以中國有可能會發動政變,扶立一個新傀儡政權,或者直接南侵。如果扶立新傀儡政權成功,一定成為中國極大財政負擔,但至少可以玩多五至十年。但如果政變失敗, 金正恩 老羞成怒一定會玩嘢,一係直接投美,一係成個核彈掟到新義州附近你都仆街。而直接南侵,更加於理無據,中國如果佔領北韓,南韓人實會憎中國嘅程度同日本一樣,南韓人憎日本因為日本曾經殖民統治過韓國,俾韓國人極大嘅痛苦,你依家中國分裂完人地國家又入侵韓國,呢鋪南韓仲會聽你中國枝笛?所以呢次特朗普玩得十分之高明,呢啲怪招係特朗普至用得掂,你習近平就自己慢慢拆飽佢。

發表迴響

你的電子郵件位址並不會被公開。 必要欄位標記為 *