通訊辦-2-min

通訊辦 被梁粉接管後虧到一個點

警察無線電干擾車亂咁干擾無線電波,搞到航管頻道被干擾,呢件事,本來 通訊辦 按專業程序,公平公正去做,要求警方負責就。只不過,由梁粉王桂壎接管之後, 通訊辦 喺維穩面前一樣跪低,竟然夠膽死話搵唔到干擾來源。

通訊辦 扮傻仔都有個限度

其實果陣點解連太平山嘅航管都受干擾,因為佐科嘅車隊去到金鐘果陣,警察無線電干擾車班硬膠,可以玩到在場所有記者嘅LTE、3G、Wi-Fi都斷晒,所以更加肯定係無差別大功率咁干擾,仲有人挑我機話無人授權干擾licenced band,依家堅係有人干擾咗有牌嘅頻譜,而不知所蹤,如果記者通訊受干擾嘅時間,同民航處通訊受干擾時間脗合,甚至有人聽電台都受影響嘅話(請聽電台啲人報料,特別喺港島果啲),咁件事就好清楚,就係警方用無差別大功率干擾手段去護送佐科嘅車, 通訊辦 係唔係應該調查,依家 通訊辦扮傻仔話無嘢,咁民間電台果啲碎料到爆,功率完全係業餘級數嘅廣播,仲要無明顯干擾航管通訊,你班友又咁快查得到,你班友無病嘛。

通訊辦 扮傻仔係有個限度,我唔係持牌嘅業餘無線電發燒友,但我叫做過吓電訊,都知果啲係乜事嚟。警方要干擾2G, 3G, LTE頻譜,慎防有人用印尼回教祈禱團慣用嘅3310遙控炸彈,我可以理解,因為港島都有唔少印尼僑民,但果啲印尼僑民係唔係恐怖分子,連我呢個有印尼血統嘅人都唔敢擔保,唔好講警方。但航管嘅118-130MHz係絕對無必要去干擾,究竟警方爆炸品處理課班友,知道唔乜嘢叫選擇性干擾,同埋事前規劃反恐部署果陣,有無諮詢過 通訊辦 以至民航處意見,自把自為到咁,我睇怕習近平要去會展住果陣,屆時港島電訊網絡不單會大亂,而且乜嘢無線電通訊都會亂過亂世佳人,唔好話記者,睇怕的士,甚至好多無線電通訊受影響。依家唔係攻殻機動隊嘅香港,啲人個個可以靠意識通訊,無線電通訊受干擾係唔會有問題。我真係留名食花生,究竟6月30日至7月1日期間,由機場到港島,將會亂成點。叫張德江千祈唔好跟住嚟,否則我睇實亂上加亂。

發表迴響

你的電子郵件位址並不會被公開。 必要欄位標記為 *